Нийслэлийн иргэдийн төлөөлөгчдийн хурал /НИТХ/-ын Нийгмийн хөгжлийн хороо хуралдаж, нийслэлээс энэ он болон ирэх онд авч хэрэгжүүлэх арга хэмжээ, бүтээн байгуулалтын асуудлаар хэлэлцжээ.
Тухайлбал, ирэх 2018 онд нийслэлийн төсөв, гадаадын зээл, тусламжийн хүрээнд 8825 ортой 50 цэцэрлэг, 240 хүүхдийн хүчин чадалтай сувиллын цэцэрлэгийн барилгын ажлыг эхлүүлж, энэ онд нийслэлийн төсвийн хөрөнгөөр барилгын ажил нь эхэлсэн 1335 хүүхдийн хүчин чадалтай долоон цэцэрлэгийн барилгыг ашиглалтанд оруулахаар болжээ.
Мөн энэ ондоо багтааж 18690 суудалтай 30 сургуулийн барилгын ажлыг эхлүүлэхээр төлөвлөсөн байна. Харин эрүүл мэндийн үйлчилгээний хүртээмжийг нэмэгдүүлэх хүрээнд ирэх онд Азийн хөгжлийн банкны дэмжлэгтэйгээр 10 загвар өрхийн эмнэлэг барих ажлыг эхлүүлж, Сонгинохайрхан дүүргийн нэгдсэн эмнэлгийн барилгын ажлыг үргэлжлүүлэх аж.
Түүнчлэн Чингэлтэй дүүрэгт хүүхдийн эмнэлэг, Эрүүл мэндийн төвийн 2-р амбулаторийн барилга, Нийслэлийн Түргэн тусламжийн төвийн Чингэлтэй салбарын барилга болон Хан-Уул дүүргийн Туул тосгоны эрүүл мэндийн төвийн барилгын ажлыг тус тус эхлүүлэхээр болсон талаар НИТХ-ын Хэвлэл мэдээллийн албанаас мэдээлэв.
