Өнгөрөгч сарын буюу наймдугаар сарын 19-ний өдөр БНСУ-ын Инчон хотын Бүпён дүүрэгт хоёр жил гаран буудалд ажиллаж байсан монгол эмэгтэй Солонгос захиралдаа зодуулсан хэрэг гарсан билээ.

Тодруулбал Солонгос захирал нь түүнийг хүчирхийлэхийг завдахад хохирогч эмэгтэй эсэргүүцсэнээр түүнд цаг гаруй зодуулсан байна . Хохирогч эмэгтэй амьд гарахын тулд буудлаас өмссөн хувцастайгаа хөл нүцгэн зугтан гарч ойролцоох дэлгүүр рүү гүйж ороод дэлгүүрт байсан хүмүүсээс тусламж хүссэнээр цагдаа дуудаж өгсөн байдаг. Гэвч хэсгийн цагдаа хохирогчийг хууль бусаар оршин сууж байсан гэх шалтгаанаар эмнэлгийн анхан шатны тусламж ч үзүүлэлгүй шууд саатуулах байр руу шилжүүлсэн мөн түүнийг зодсон захирал нь цагдаа нарт "энэ монгол эмэгтэй согтуугаар надруу дайрч намайг зодсон" гэх мэдүүлэг өгчээ. Ингэснээр хохирогч эмэгтэйд "гэмт хэрэгтэн" гэх хэрэг үүсгэн шалгаж хэрэг буруу бүртгэгдсэн талаар эх сурвалж мэдээллээ. Хэрэг гарах үед хохирогч эмэгтэй Солонгос хэл сайн мэдэхгүйн улмаас цагдаа нарт өөрийгөө хохирсон гэдгээ илэрхийлж мэдүүлэг өгч чадаагүйн улмаас ийм байдалд хүрээд байгааг хэлж байсан юм. Мөн хохирогч эмэгтэйн хавирганы 3 яс хугарч биеийн байдал хүнд байгаа бөгөөд одоогоор эмнэлэгт хэвтэж байгаа юм.

Дашрамд дурдахад хохирогч эмэгтэйд тус улсад оршин суудаг н.Аззаяа гэх эмэгтэй болон "Zolboo TV" хамтран хэргийг үнэнээр шийдүүлэхээр туслалцаа үзүүлж байгаа юм.

Уг хэрэг дээр өмгөөлөгч авсан бөгөөд өчигдөр буюу есдүгээр сарын 6-наас эхлэн хэрэгтэй ажиллаж эхэлсэн байна. Ингээд хохирогч эмэгтэй маань гэм буруугүй гэдгээ тогтоолгохоор шүүх хурлаар орох юм байна.

Нэмэлт мэдээлэл: БНСУ-ын Инчон хотын Бүпён дүүрэгт байрлах уг буудалд өмнө ажиллаж байсан Монгол эмэгтэй тухайн захиралд зодуулдаг байсан энэ бол давтан хэрэг гэх мэдээллийг мөн өгөөд байгаа юм.