-МАН-ЫН ЕРӨНХИЙ “ТОГООЧ”-ОО ХАЖУУДАА ТОГТООХ ЭСЭХЭЭС ХАМААРЧ ТЭР БАГТАЙ ЕРӨНХИЙЛӨГЧ БАЙХ УУ, ГАНЦААРАА ЯВАХ УУ ГЭДЭГ НЬ ТОДОРХОЙ БОЛНО-

Явж ирснээсээ хойш дандаа бөөцийлүүлсэн улстөрч бол У.Хүрэлсүх. Ерөнхийлөгч болон болтлоо тэр Монголын ард түмэн, намын ах, дүү нарынхаа алган дээр ёстой бөмбөрсөн. Ингэж эрхэлсээр хүрэх гэж зорьсон албан тушаалдаа ч очсон. Үүнээс хойш түүнийг бөөцийлөх хүн тун цөөн байх болов уу, улс төрийнхний жамаар бол. Өөрөөр хэлбэл, одоо түүнд хамтрагч гэж үгүй. Нэг талаар тэр улс төрийн ялангуяа МАН-ын улс төрийн тоглоомоос хасагдсан.

Үүний эхлэл, илрэл аль хэдийнэ тавигдчихаад, тэр яг үнэндээ өдгөөгөөс зургаан сарын өмнөх Х.Баттулгын цус амтагдтал хөмхийгөө зууж асныг мэдэрч суугаа. Юу гэхээр, "Холын замд, ядаж л 2050 руу хөтөлгөө морь шиг давхина" гэж итгэж байсан нэг дүү нь өөрийн фракцаа зузаатгаж, намын түвшин бүрт төлөөллөө аль хэдийнэ бат гэгч нь “зоочихоод”, үйлдлээрээ “Ах аа, одоо хоёр талдаа гаръя аа” гээд эхэлсэн. Гол нь өөрийнх нь хүч, түлхээс, нөлөөллөөр Үндсэн хуулийн цэц, шүүх, тагнуул, прокурор, хууль гээд эрх мэдэл байж болох бүх салбарт удирдах албан тушаалд хамаг хүнээ томилуулчихсан болохоор У.Хүрэлсүхэд дэндүү гомдолтой, хөндүүр байгаа. Ядаж байхад хэдхэн жилийн өмнө М.Энхболд тэргүүтэй ах нартаа гаргаж байсан үйлдлүүд, үгстэй нь яг ижил зүйл яриад, хийгээд эхлэхээр бүр барьц алдаж байж ч мэднэ.

Ийм учир тэр Ерөнхийлөгчийн сонгуулиас хойш "Гаднын томчуултай утсаар ярьсан" гэх зургаа жиргээч, сошиалчдадаа өгч, нийтэд тараалгах, Ерөнхийлөгч болохын тулд Х.Баттулгын гараар “барьж, хорьсон” улстөрч ах, дүүсээ шоронгоос суллахаас өөр үйлдэл бараг хийсэнгүй. Албанд томилогдонгуутаа зарчмынхаа эсрэг зогсож, “даалгавар”-аа биелүүлээд эхэлсэн Ерөнхийлөгчид залуусын фракц дургүйлхэж эхэлсний дохио нь “Үндсэн хуульд нэмэлт өөрчлөлт оруулна” гэх сэвээ нэртэй шийдэл бололтой. Тэд хүсвэл нэмэлт өөрчлөлт оруулна.

Юу гэхээр, холын замд, ядаж л 2050 руу хөтөлгөө морь шиг давхина гэж итгэж байсан нэг дүү нь өөрийн фракцаа зузаатгаж, намын түвшин бүрт төлөөллөө аль хэдийнэ бат гэгч нь “зоочихоод”, үйлдлээрээ “Ах аа, одоо хоёр талдаа гаръя аа” гээд эхэллээ

Гэхдээ Ерөнхийлөгчид сайн менежер дүү нь үлдсэн. Сүүлийн гурван жилд "Ерөнхийлөгч, намын даргаасаа ч илүү нөлөө бүхий хүнээр тодроод байгаа, МАН-ын нууц ноёнтон, хамаг хар бор ажлыг нь нугалсан шиг нугалдаг, нугалсан шигээ хөлсөө ч авч чаддаг" гэгддэг менежерээ дэргэдээ тогтоох эсэх нь У.Хүрэлсүхийн дараа дараагийн нүүдлээс хамаарна. Өөрөөр хэлбэл, МАН-ын “гал тогоо”-ны ерөнхий “тогооч”-оо тогтоох эсэхээс хамаарч тэр багтай Ерөнхийлөгч байх уу, ганцаараа үлдэх үү гэдэг нь тодорхой болох юм. 

Ганцаараа үлдвэл өмнөх Ерөнхийлөгчийн адил ганцаардсаар, ганц илүү хөдөлгөөн хийж чадахгүй шахуулсаар албаа дуусгана. Ядахад яг тэр нөхцлийг нь өөрөө бүрдүүлж, хажуунаас нь мэдэрч, магад таваа хангаж асан болохоор өөрөө тийм байдалд орох вий гэхээс шар үс нь босож байгаа биз ээ. Ийм ч учраас менежер дүүгээ алдахгүйн тулд тэр сүүлийн өдрүүдэд зарим дуулиант бичлэг, сүртэй нэгжлэгийг эхлүүлэв бололтой. Зарим эх сурвалжийн мэдээлснээр энэ нь цөөнгүй "анги"-тай байх бөгөөд ихэвчлэн сүргийн манлайнууд бус тэдний доод албан тушаалтнуудыг чиглэсэн баривчилгаа, нэгжлэг байх гэнэ. Гэвч энэ бүхэн зорилтот эзэндээ цохилт биш олз болж байхыг үгүйсгэх аргагүй.

Өөрөөр хэлбэл, одоо түүний хийсэн болгон дүү нартаа өөрийгөө “өгөх” өгөөш болно. Хэн нь хэнийгээ юу хийхийг, хэрхэн хөдлөхийг, түүнд нь ямар хариу барих вэ гээд үйлдэл бүр нь бие биенийхээ алган дээр тавьсан юм шиг болох хүртлээ ижилдсэн, сүлэлдсэн, сүжирсэн гурав шүү дээ. Улс төрийн хань, хамтрагчдаа “алдаж” дуусах нь У.Хүрэлсүхийн хувьд цаг хугацааны л асуудал. Нэг үгээр, хамтрагч байсан хэн бүхэн нь одоо түүний өрсөлдөгч болсон. 
 

Нэг үгээр хамтрагч байсан хэн бүхэн нь одоо түүний өрсөлдөгч