ОХУ-ын жүдо бөхийн шигшээ багийн анхны медалийг 22 настай Мадина Таймазова авчирлаа. Мадина “Токио 2020” олимпын наадмын жүдо бөхийн эмэгтэйчүүдийн -70 кг-ийн жинд хүрэл медаль хүртсэн юм. 

Барилдааны үеэр баруун нүдэндээ гэмтэл авсан хэдий ч эцсээ хүртэл тэмцэж, хүрэл медаль хүртсэн Мадинагийн тэсвэр хатуужил дэлхий нийтийг шуугиулж байна.  

Мадина шөвгийн 16-ын барилдаанд Бразилын жүдоч Мария Портелатай оноолт таарчээ. Харамсалтай нь тус барилдааны үеэр нүдэндээ гэмтэл авсан юм. Тодруулбал барилдааны үеэр Бразилын жүдоч өрсөлдөгчөө тохойгоороо цохьсон байна. Дараа дараагийн барилдаануудад баруун нүдээрээ юу ч харж чадахгүй болно гэдгээ таамаглаагүй байсан Мадина тухайн үед барилдаанаа хэвийн үргэлжлүүлэв. Хоёр жүдочийн нийт 16 минут үргэлжилсэн барилдаанд торгуулиар Мадина Таймазова түрүүлсэн юм.  

17 МИНУТ ҮРГЭЛЖИЛСЭН БАРИЛДААН

Японы Тизуру Араи, Оросын Мадина Таймазова нарын барилдаан

Шөвгийн наймд Грекийн жүдоч Элисавет Тельцидуг 32 секундэд цэвэр ялсан Мадинагийн дараагийн учраа дэлхийн таван удаагийн аварга Японы Тизуру Арай байлаа.  

Финалд шалгарахын төлөө Япон жүдочтой барилдахын өмнө Мадинагийн баруун нүд хавдаж, нүдээ нээж чадахгүй болов. Олимпын наадмаас алтан медаль авах зорилготой ирсэн жүдоч бүсгүй тэмцээнээ үргэлжлүүлэхээр шийдвэрлэв. 

Япон, Оросын жүдочид 17 минутын барилдаж, зөвхөн 17 дахь минутад Мадина өрсөлдөгчийнхөө боолтод  орсон ч тэссээр татами дээр ухаан алдаж ялагдлаа. 

Японы Тизуру Араи, Оросын Мадина Таймазова нарын барилдаан

ОХУ болон Японы жүдоч нарын барилдаан жүдо бөхийн түүхэнд дээд амжилт тогтоосон гэж хэлж болно. 

Ухаан алдаж унасан Мадина Таймазовад хүрлийн төлөөх барилдааны өмнө сэргэх, сэтгэл зүйгээ бэлдэхэд нэг цагийн хугацаа байсан бөгөөд 22 настай жүдоч бүсгүй Токиогийн олимпоос жүдо бөхийн анхны медалийг эх орондоо авчирлаа. Оросын хэвлэлүүд түүний ялалтын алтын дайтай хүрэл медаль хэмээн онцолж буй юм. 

Барилдааны дараа хэвлэлүүдэд өгсөн ярилцлага Мадина Таймазова  "Би энэ олимпоос алт авахын төлөө ирсэн. Үүний төлөө өөрийгөө 100 хувь дайчилсан боловч харамсалтай нь амжилтад хүрсэнгүй. Баруун нүд минь хараагүй болсон ч дэвжээнд гарч барилдахад бэлэн байсан.

Мөнгөн медалийн төлөөх барилдааны төгсгөлд өрсөлдөгч маань зөвшөөрөгдөөгүй мэх ашигласан. Гар хугалах аюултай хөшилт хийсэн. Шүүгч түүнд сануулга өгөөгүй. Гэсэн ч үүнийг би бууж өгөх шалтгаан гэж хүлээн аваагүй. Эцсийн мөч хүртлээ тэмцсэн. Ухаан ороход ялагдал хүлээсэн гэдгээ мэдсэн.

Японы жүдочтой барилдаж байх үеэр нүд маань улам хавдаж, харагдах орчин улам бүдгэрсээр байсан. Ямар ч тохиолдолд эцсээ хүртэл тэмцэх ёстой гэдгээ мэдэж байсан. Хүрлийн төлөөх барилдааны үеэр мөн адил өвдөлтийг бодохгүй өрсөлдөгчдөө гол анхаарлыг хандуулахыг зорьсон. Би хүрэл медалийн төлөө эцсээ хүртэл тэмцэхээр гарсан, энэ бол миний үүрэг” гэж хэлжээ.  ​