ХОЁР ӨӨР ТӨРЛИЙН ВАКЦИН ХЭРЭГЛЭСЭН Ч ЭСРЭГБИЕИЙН ТИТР НЭМЭГДЭХ МАГАДЛАЛ ӨНДӨР БАЙНА /ИСПАНИ/

2021 оны 06 дугаар сарын 21-нээс 27-ны хооронд Олон улсад анагаах ухааны мэргэжилтнүүдийн дунд хамгийн их жиргэсэн сэдэв бол SARS-CoV-2 эсрэг вакцины тухай сэдэв байлаа.

Магадгүй олон хүн энэ тухай нэг удаа ч болов бодож байсан байх. Юу вэ гэхээр:

"Хэрэв 2 өөр төрлийн вакциныг хэрэглэвэл COVID-19 өвчнөөс урьдчилан сэргийлэх үр нөлөө бий болов уу? гэсэн асуулт.

Тэгэхээр энэ асуултад хариулт болох судалгаа Олон улсын нэр хүнд бүхий анагаахын шинжлэх ухааны Ланцет сэтгүүлд нийтлэгджээ. Энэ судалгааны талаар нийтдээ 7651 жиргээ хийгдсэн байгаа нь дээр дурдсан 7 хоног дахь хамгийн олон жиргээ болсон сэдэв болж.

Эх сурвалж: Lancet. June 25, 2021 doi.org/10.1016/S0140-6736 (21)01420-3

AstraZeneca вакцинаар анхны тунг тарьсны дараа хоёр дахь тунг Pfizer вакцинаар хийсэн Испанийн судалгааны багийн COVID-19-ийн эсрэг гетерологи вакцины талаарх эмнэлзүйн II шатны туршилт судалгааны үр дүн.

18-60 насны нийт 676 оролцогчийг вакцины тарилгын бүлэг (450 хүн), хяналтын бүлэг (226 хүн) гэсэн 2 бүлэгт санамсаргүй байдлаар хуваарилсан. Ингээд 2 бүлэгт 2 дахь тунгийн вакцин хийснээс хойш 14 хоногийн дараах вакцины үр дүн, аюулгүй байдлыг харьцуулан судалсан байна.

Үр дүнгийн хувьд тарилгын бүлэгт RBD (Receptor-Binding Domain)-ийн эсрэг үүссэн эсрэгбиеийн геометрийн дундаж титр суурь түвшинд 71.46 BAU / мл-ээс 14 дэх өдөрт 7756.68 BAU / мл болж мэдэгдэхүйц нэмэгдсэн байна.

Титэм уургийн эсрэг үүссэн IgG нь 98.40 BAU / мл-ээс 3648.87 BAU / мл болж өссөн.

Аюулгүй байдлын хувьд биемахбоид үзүүлэх сөрөг хариу урвалын 68% нь хөнгөн, 30% нь дунд зэргийнх байсан. Ихэнхдээ тарилгын талбай өвдөх (88%), хавдаж хатуурах (35%), толгой өвдөх (44%), булчин өвдөх (43%) зэрэг байсан ба ноцтой сөрөг үзэгдэл бүртгэгдээгүй байна. Энэ нь өөрөөр хэлбэл 2 удаагийн вакцин хийлгэсэнтэй ижил түвшинтэй байна гэсэн үг.

Дээрх үр дүнгээс харахад AstraZeneca вакцинаар анхны тунгаа авсан хүн Pfizer вакцинаар хоёр дахь тунгаа хийлгэхэд дархлааны хүчтэй хариу урвал үүсч, гаж нөлөө нь зөвшөөрөгдсөн хэмжээнд байсан юм байна.

Миний бодол:

Нэлээд хэд хоногийн өмнө Германы канцлер Меркель хатагтай AstraZeneca вакцинаар анхны тунгаа харин хоёр дахь тунгаа Moderna вакцин хийлгэлээ гэсэн мэдээлэл олж харсан юм. Тухайн үед AstraZeneca вакцинаас үүдэлтэй дархлааны тромбоцитопени өвчнөөс болгоомжилсны улмаас эхлээд AstraZeneca вакцин хийлгэсэн хүмүүст гетерологийн вакцины үр нөлөө, аюулгүй байдлын талаар Европт өрнөсөн мэргэжилтнүүдийн хоорондох халз мэтгэлцээнээс болж ийм шийдвэрт хүрчдээ гэсэн юм бодож байлаа. Гэтэл мань Меркель хатагтай харин ч халдвараас урьдчилан сэргийлэх үр нөлөө өндөр байгааг нь харгалзаж үзсэн байх магадлалтай юм байна.

Энэ удаа 2 өөр төрлийн вакцины, бүр тодруулж хэлбэл вектор вакцин болон mRNA төрлийн вакцинуудын нэг нэг тунг тарихад үр дүн аюулгүй байдал нь ямар байгаа тухай судалгааны үр дүнг бид олж мэдлээ. Үр дүн нь эсрэгбиеийн титр суурь үзүүлэлттэй харьцуулахад маш сайн нэмэгдэж, сөрөг үр дагавар нь нэг вакциныг хоёр удаа тариулсантай ижил төстэй байгаа тул энэ байдлаар хэрэглэх боломжтой юм шиг байна.

Ялангуяа вакцины үйлдвэрлэл, хувиаарилалт, түгээлтийн асуудалтай байгаа нөхцөл байдлаас улбаалаад вакцины 2 дахь тунгаа хийлгүүлж чадахгүй байх хугацаа алдах гэх мэт бэрхшээлүүд байсаар байна. Тухайлбал манайд Спутник 2-р тун маш их хүлээгдсэн, одоо ч зарим хүмүүс хүлээгдэж байгаа жишээнүүд байна. Эндээс улбаалаад вакцин тарилгын хуваарь алдагдах эрсдэл байгаа гэсэн үг.

Нөгөө талаар ялангуяа манай улсын хувьд яагаад ч юм бэ вакцины бүрэн 2 тун авсан ч гэсэн хэдийгээр хөнгөн тусаж байгаа ч халдварт өртөх хувь өндөр байх шиг байгаа. Дархлаа тогтоцтой холбоотой ямар нэгэн хүчин зүйл байхыг үгүйсгэхгүй. Энэ тохиолдолд дахин 3 дахь тун авах нөхцөл байдал, зайлшгүй хэрэгцээ шаардлага үүсч болох юм.

Магадгүй 3 дахь тун буюу өдөөгч тунгаар дахин вакцинжуулах тухай албаны хүмүүсийн хэлцэл яриа хийгдэж байгаа энэ цаг үед магадгүй өмнөх 2 тун нь AstraZeneca эсвэл Спутник байсан хүмүүст 3 дахь тун нь Pfizer эсвэл Moderna вакцин байж ч болох юм шиг байна.

Ямар ч байсан сонирхолтой л юм байна. Хамгийн эхэнд дурдсанчлан өнгөрөгч 6 сарын сүүлийн долоо хоногт мэргэжлийн хүмүүсийн дунд хамгийн их шуугисан гол мэдээлэл энэ байлаа.

Ойдовын Батгэрэл Ph.D

2021/07/07, Лхагва гараг