Цементийг цахилгаан станцын үнстэй хольж савлан, иргэдийг төөрөгдүүлэн худалдаж байсан хүмүүсийг ЭЦА-ны Эдийн засгийн гэмт хэрэгтэй тэмцэх газрын ажилтнууд 2020 оны аравдугаар сард илрүүлж байв. Уг хэрэгт НПГ-аас яллах дүгнэлт үйлдэн Сонгинохайрхан дүүргийн Эрүүгийн хэргийн анхан шатны шүүхэд хүргүүлжээ. Сонгинохайрхан дүүргийн XX, Баянгол дүүргийн XXIV хорооны нутагт ийм хууль бус зүйл хийж байсан бөгөөд 70 гаруй тн хуурамч цемент эд мөрийн баримтаар хураасан юм. Тодруулбал, иргэн С.Оюунзул нь 2020 оны зургадугаар сараас аравдугаар сарын 16 хүртэлх хугацаанд Сонгинохайрхан дүүргийн XX хорооны нутагт “МАК цемент” ХХК-ийн 50 кг савлагаатай цементийн уут, барааны тэмдгийг ашиглан, үнс хольсон 58 тн хуурамч бүтээгдэхүүн үйлдвэрлэж, хадгалсныг мөрдөн шалгах ажиллагаагаар тогтоожээ. Ийнхүү хууль бус үйлдэл хийснээр “МАК цемент” ХХК-д 3.6 сая гаруй төгрөгийн хохирол учруулсан аж. Мөн иргэн М-д үнс хольсон 24 тн цементээ тээвэрлэн, худалдсанаар 5.9 сая гаруй төгрөгийн хохирол учруулсан байна.
Харин өөр нэг холбогдогч О.Мягмарсайхан нь 2020 оны тавдугаар сараас аравдугаар сарын 16-ны хооронд Сонгинохайрхан дүүргийн XX хорооны нутагт мөн л дээрх аргаар “МАК цемент” ХХК-ийн уутыг ашиглан, үнс хольсон 132 250 тн хуурамч бүтээгдэхүүн үйлдвэрлэж, хадгалсныг ЭЦА-ны Эдийн засгийн гэмт хэрэгтэй тэмцэх газрынхан тогтоожээ. Түүгээр ч зогсохгүй “Эс эй констракшн” ХХК-д 68, “UB гэгээн монгол девелопмент” компанид 60 тн-ыг нь хүргэж өгч борлуулсан нь батлагдсан аж. Ингэснээр “МАК цемент”-д 8.4 сая төгрөгийн хохирол учруулсан бол “бараа”-г нь худалдан авсан дээрх хоёр аж ахуйн нэгжийг нийт 30 гаруй сая төгрөгөөр хохироосныг мөрдөн шалгалтаар тогтоосон гэнэ.
Тэднийг саатуулан нэгжлэг хийх үед “МАК цемент”-ийнхээс гадна БНХАУ-ын үйлдвэрүүдийн шошготой 400 уут үнс хольсон “бараа” битүүмжилснээс гадна “Монцемент”, “Тайга”, “Байкаль” болон хятад ханзаар бичсэн 14 000 уут ашиглахаар хадгалж байсныг эд мөрийн баримт болгож хураасан талаар бид цаг тухайд нь мэдээлсэн билээ. Шалгалтын явцад хэрэгт холбогдсон хүмүүс “ДЦС-4” ХК-ийн зарим ажилтантай хуйвалдан 20 тн үнсийг нэг сая төгрөгөөр худалдан авсан нь ч батлагдсан гэдэг.
НПГ-аас С.Оюунзул, О.Мягмарсайхан нарт Эрүүгийн хуулийн 18.16-2.1 дэх хэсэгт заасан “Бусдын барааны тэмдгийг ашиглан хэрэглэгчийг төөрөгдөлд оруулан хуурамч бараа, бүтээгдэхүүн үйлдвэрлэсэн, хадгалсан, тээвэрлэсэн, худалдсан хэргийг байнга тогтвортой үйлдсэн” хэмээн яллах дүгнэлт үйлдэн гэм буруутай, эсэхийг нь дэнслүүлэхээр болоод байна.
