УИХ-ын гишүүн асан Б.Жаргалсайхан өөрийн цахим хуудсаараа дамжуулан Засгийн газраас тайлбар шаардаж буйгаа илэрхийллээ. Энэ нь коронавирусийн нөхцөл байдал хүндэрсэнтэй холбоотой аж. Тодруулбал, Ерөнхий сайд Л.Оюун-Эрдэнийн Засгийн газар энэ сарын 15-наас эхлэн халдварын тохиолдол эрс буурч, нөхцөл байдал намдсанаар наадам тэмдэглэх хэмжээнд хүрнэ хэмээн мэдэгдэж байсан нь саяхан. Харамсалтай нь, сүүлийн үед халдварын тохиолдолд өдөрт 2000 давж бүртгэгдэх болсон билээ. Засгийн газрын энэ мэт уялдаагүй шийдвэр нь коронавирусийн халдварын тохиолдлыг нэмэгдүүлэх шалтгаан болсон учир Б.Жаргалсайхан үүнд тайлбар нэхжээ.

Тэрбээр “Хангалттай хүлээж, тэвчсэн, улс төржихгүй азнасан иргэд Засгийн газраас тайлбар шаардах нь зүйн хэрэг. Хамгийн сүүлд тогтоосон хатуу хөл хорионы дараа энэ сарын 15 гэхэд халдварын тохиолдол буурна, халдваргүй зун, наадам тэмдэглэнэ гэж амласан эрх баригчдаас тайлбар шаардах цаг болжээ. Могойд барьдаг мод гэдэг шиг хэвлэлийн ажилтнаас бус Ерөнхий сайд Л.Оюун-Эрдэнэ, Шадар сайд С.Амарсайхан тэргүүтэй нөхөд хаана алдсан, оносон гэдгээ тайлбарлах цаг болжээ. Шадар сайд буруутай юу, эрүүл мэндийн салбар хүч хүрэхгүй байна уу. Халдварын тархалт хаана голдуу гараад байна гэдгээ ч зарла. Сонгуулиас, одон медаль, хурал цуглаанаас хэдэн хувь гэх мэт тайлбарлах хэрэгтэй. Яагаад вакцин тариулсан иргэн нас барав гэдгийг шинжлэх ухааны үндэстэй сонсмоор байх юм. Иргэд одоо яах вэ. Улаанбаатараас зугтаагаад уулын мухарт хэвтэх үү, зуныг яаж авах вэ” хэмээн бичжээ.