Герман хүүхдэд нэг ширхэг чихэр өгвөл ээж рүүгээ харна. Энэ нь би авч болох уу гэсэн санаа, тэгээд зөвшөөрвөл маш их баярлана. Тэд яагаад ингэдэг вэ?

Манай хоёр хүүхдэд өчигдөр цэцэрлэгээс нь Хүүхдийн баярын бэлэг өгчээ. Өндөгний савыг зүсэж урт хүр хорхой хийгээд дээр нь дөрвөн ширхэг шоколадтай чихэр наасан байв. Харин хажуу хөрш цаасаар баавгай хайчилж, дээр нь 5 гр-ын Харибо наагаад манай хоёрт бэлэг болгон өглөө.

Тэр хоёр баярын өдөр Харибогоо идсэн тул цэцэрлэгийн бэлэг дараагийн өдрүүдэд хадгалагдаж үлдэв.

Энд хүүхэд өдөрт нэг ширхэг чихэр идэж болохыг эцэг эхчүүд зөвшөөрдөг. Чихэр идсэн бол дараа нь шүдээ сайтар угаана. Зарим эцэг эхчүүд чихрийн оронд жимстэй йогурт өдөрт цайны цагаар өгөх нь бий. Энэ нь чихэр үнэтэй учраас бага өгч байгаа биш. Харин идэх ёстой хэмжээнд нь тааруулж өгч байгаа юм.

Германд ирснээс хойш энд бэлэг өгөх соёлд би нилээд суралцах шаардлагатай болсон. Энд байдаг Японы соёлын төв дээр япон найзтай хамт бэлэг өгөх, боох сургалтанд сууж байхдаа ихийг ойлгож авч байв. Аливаа бэлэг сэтгэлийн жижигхэн баяр хөөр байх ёстой. Тэрнээс хэрэгцээ хангагч биш.

Ер нь баярын бэлэг өгөх нь бэлгэндээ биш харин энэ өдөр би чамайг бодож, санаж байна шүү гэдэг утга санааг илэрхийлдэг. Тиймээс бэлэг авсан хүнээ эвгүй байдалд оруулахгүй байх ёстой.

Таван евроноос дээш бэлэг, энэ нь 15000 төгрөгнөөс үнэтэй бэлгийг багш нар, төрийн албан хаагчид авахыг хориглодог.

Харин найз нөхдийн хувьд жижигхэн ном, дэвтэр эсвэл цэцэг өгнө.

Хамаатнууд манай ирвэл бид ихэвчлэн хиам, өндөгний ликёр өгдөг. Манай муж үүгээрээ алдартай юм.

Шинэ жилийн баяраар хамаатны 10-18 настай хүүхдүүдэд манайх 10 евро өгнө. Өсвөр насныхан мөнгө өгөхөөр их баярладаг.

Жижигхэн бэлэг өгөхөөр үүнийг л өгч байгаа юм уу гэж ханддаг монгол зарим найз нартаа би бэлэг өгөхөө больсон. Ном өгөхөөр хавтасыг нь хараад л цааш тавьчихдаг.

Харин герман хүнд үнэтэй бэлэг өгвөл гайхаж хүлээн авна. Харин буцаагаад юм авна эсвэл хүндлэл хүлээнэ гэж найдах хэрэггүй. Тэд нөгөө л герман зангаараа баярлалаа гэж хэлээд л болоо.

Батчулууны Чимэдлхам