Хүн төрөлхтөн Сар, Ангараг гариг дээр хот байгуулж, хиймэл оюун ухааны тусламжтайгаар ухамсрын хил хязгаарыг өргөжүүлэх цаг болжээ. Энэ талаар болон шашин шүтлэг, харь гаригийнхан, суралцах зөв хандлагын талаар SpaceX, Tesla компанийг үүсгэн байгуулагч Илон Маск “Шинэ мэдлэг” марафоны үеэр оросын залуу үеийнхэнд өөрийн санаа бодлоо хуваалцжээ.

Оросын боловсролын “Знание” нийгэмлэгээс зохион байгуулсан “Шинэ мэдлэг” марафонд Илон Маск цахимаар холбогдон оролцсон. Тэрбээр АНУ, ОХУ нар харилцаа холбоогоо сайжруулах нь их чухал гээд, хүн төрөлхтөн Сар, Ангараг гариг дээр хот байгуулж, хиймэл оюун ухааны тусламжтайгаар ухамсрын хил хязгаарыг өргөжүүлэх талаар ярьсан байна.

Ирээдүй ба өнөөгийн тухай

ОХУ-ын Ерөнхийлөгч Путиний хэвлэлийн нарийн бичгийн дарга Дмитрий Песков түүнтэй мэндчилээд эхний асуултыг асуулаа. Тэрээр та манай дэлхийг 50 жилийн дараа ямар болно гэж төсөөлж байна? Үүний төлөө та юу хийж байгаа вэ? Энэ талаараа Оросын залуучуудад ярьж өгнө үү? гэжээ.

“Урьдчилж хэлэхэд хэцүү л дээ. Ямартай ч бидний одоогийн төсөөлж байгаагаас тэс өөр байна. Хиймэл оюун ухааны технологи, сансрын аялал, тархины компьютерийн интерфейс, синтетик РНХ, ДНХ-ийн хөгжилд томоохон ахиц гарч байгаа. Энэ бол том өөрчлөлт” гэж технологийн ертөнцийн алдартан хэлсэн байна.

Илон Маск дараа нь яагаад “Шинэ мэдлэг” марафонд оролцох болсон шалтгаанаа тайлбарлалаа. Түүнд оролцох саналыг Дмитрий Песков тавьжээ. “Энэ бол маш сайн зүйл. АНУ, ОХУ-ын хооронд харилцаа холбоо илүү сайжрана” гэж үзэж байгаагаа илэрхийлжээ.

Сансар судлалын талаар

Дэлхийн аль ч улс орон сансрыг судлахдаа Константин Циолковскийн гаргасан зорилгыг өмнөө тавих ёстой. Дэлхийн “өлгий”-нөөс Орчлон ертөнцийн уудамд гарах. “Дэлхий бол хүн төрөлхтөний өлгий. Гэхдээ би үргэлж өлгийдөө байгаад байж болохгүй” гэсэн Орос эрдэмтэний үгийг Маск санууллаа.

Түүний хэлсэнээр, Олон улсын сансар судлал нь чухал үүрэг гүйцэтгэдэг бөгөөд олон улсын сансарын хамтын ажиллагаа их чухал юм. Ямар нэгэн асуудал дээр гацах ёсгүй. Дараагийн алхам бол саран дээр бааз байгуулж, Ангараг гариг дээр хот байгуулах.

“Интерфак”-ын сануулж байгаагаар, энэ оны гуравдугаар сард Орос, Хятад улс саран дээр олон улсын судалгааны станц байгуулах санамж бичигт гарын үсэг зуржээ. Өмнө нь нэгдүгээр сард ОХУ нь сарны эргэн тойронд хот барих Gateway Америкийн төслөөс гарсанаа мэдэгдсэн юм. Эхэндээ үүнийг сарыг судлах, дараа нь Ангараг гариг руу явж байгаа сансарын нисэгчдийн дамжин өнгөрөх цэг болгон ашиглах зорилготой байсан билээ.

Харь гаригийхны талаар асуухад Илон Маск “Одоогоор мэдэгдэх шинж тэмдэг алга байна. Гэхдээ Орчлонгийн хаа нэгтээ өөр амьдрал байж болзошгүйг үгүйсгэхгүй. Би өөрөө ч харь гаригийн хүн шүү” хэмээн тоглоом хийв.

Хиймэл оюун ухаан, шашины талаар

Ойрын хэдэн арван жилд дэлхий ертөнцийг мэдэгдэхүйц өөрчлөх мэдээллийн технологийн салбарын нэг бол хиймэл оюун ухаан. Илон Маскийн үзэж буйгаар хиймэл оюун ухаан нь удахгүй орчуулагчийг орлох аж.

“Орчуулгын тал дээр хиймэл оюун ухаан маш гайхалтай үр дүнтэй байгаа. Жил ирэх тусам сайжирч байгаа. Тун удахгүй бидэнд орчуулагч хэрэггүй болно гэж бодож байна”. Орчуулагчийн ажлыг тэрбээр өндрөөр үнэлдэг ч хиймэл оюун ухаан энэ асуудлыг шийднэ гэж үзэж байгаагаа нэмж хэлжээ.

Өргөн утгаараа хиймэл оюун ухааны тусламжтайгаар ухамсрын хил хязгаарыг өргөжүүлэх боломжтой. Оюун ухааны “лааг” унтраахгүйн тулд бид “байнга тэмцэх хэрэгтэй” гэж Маск хэлжээ.

Бурханд итгэдэг үү, энэ шинжлэх ухаантай хэр авцалдаатай вэ? гэсэн асуултанд тэрбээр “Би шашинлаг хүн биш, шинжлэх ухаанч үзэлтэй. Гэхдээ бид хаанаас үүдэлтэй, амьдрал гэж юу вэ, бид яаж наашаа ирсэн зэрэг асуултууд сонирхолтой байдаг” гэж хариулжээ. “Оюун санаагаа тэлж, Орчлон ертөнцөөс зөв хариулт авахын тулд зөв асуулт асууж сурах гэсэн зарчим би баримталдаг” гэдгээ дурджээ.

Боловсролын талаар

Боловсролын форумын үеэр боловсролтой холбоотой асуулт асуухгүй өнгөрч болохгүй. Илон Маск багшлах зөв аргын талаар ярилаа. “Бидэнд хичээл зааж байгаа хүн яагаад биднийг сургаж байгаагаа тайлбарлах ёстой”. Хүний тархи авч байгаа мэдээллийг хэрэгтэй, хэрэггүй, ой санаандаа авч үлдэх үү, мартах уу гэж байнга дүгнэлт хийж байдаг. Тиймээс бид яагаад үүнийг сурч байгаа, энэ зүйл бидэнд хэрэгтэй юу? үгүй юу? гэдгийг мэдэх ёстой. Энэ мэдлэг өөрт нь ямар хэрэгтэй гэдгийг мэдчихвэл сурахад хамаагүй сонирхолтой байх болно гэж тэрээр хэлжээ.

Эх сурвалж: www.smotrim.ru