Монгол Улсын Засгийн газраас иргэн бүрд 300 мянган төгрөг олгох шийдвэрийг гаргасан. Энэхүү шийдвэрийг хэрэгжүүлж, нэг ч хүнийг орхигдуулахгүйн тулд Засгийн газар салбар дундын ажлын хэсэг байгуулж МУЗН, УБЕГ, Гааль, татвар, мэдээллийн төв болон манай байгууллагууд хамтарч ажиллажээ. Ингэээд нийслэлийн Нийгмийн хамгааллын тусгай төв, гэр оронгүй тэнэмэл амьдралтай иргэдэд түр хоноглох үйлчилгээ үзүүлж байгаа 3 төрийн бус байгууллага, төвлөрсөн 2 хогийн цэгт үйл ажиллан зорилтот бүлгийн 313 иргэнийн бичиг баримттай, арилжааны банкны данстай эсэх талаар судалгаа мэдээлэл авчээ. УБЕГ-т бичиг баримтжуулахаар 134 иргэний мэдээллийг гаргаж хүргүүлсэн.
Үүнээс 85 хүнд иргэний үнэмлэх шинээр олгосон гэнэ. Одоо данс нээн өгч, картжуулах ажил үлджээ. Үлдсэн 49 иргэний хувьд хаягийн болон бусад зөрчилтэй, мөн Ерөнхийлөгчийн сонгууль болох гэж байгаатай холбогдуулан шилжилт хөдөлгөөнийг зогсоон тул сонгууль дууссаны дараа бичиг баримтжуулах ажил үргэлжлэх юм. Иргэд 300 мянган төгрөгийн нэг удаагийн тэтгэмжээ аваагүй бол Ибаримтын цахим хуудсаар мэдээллээ шалган мөн хуудсаар өргөдөл гарган, мөнгөө авахыг ХНХЯ-наас зөвлөж байна.
