Хажуу айлын эхнэр, нөхөр гэж хоёр хүн байна аа. Байнгын бухимдалтай. Гэрээсээ гарахдаа хаалгаа саваастай. Лифтэнд ороод кноп чичээстэй. Орцоор гаруутаа агаарын муухайг гайхаастай, гудамжаар алхахдаа бусдын арчаагүйг дуудаастай.

Гэртээ ирэхдээ дахиад л бухимдал дүүрэн. Орцыг заваан л гэнэ, лифтийг удаан л гэнэ. Бусдын нүдээр бол орц нь цэмцгэр, лифт хурдан л явах аж. Мань нөхөд лифтээр зүгээр ч явахгүй. Тэнд таарсан ганган нэгнийг авилгач луйварчнаар нь дүгнэх юм, орцонд зөрсөн настныг гуйлгачин түүлэгчнээр нь дээрэлхэх юм. Гэтэл өөрсдөө зээлсэн мөнгөө өгдөггүйгээрээ цуутай, байрны мөнгөө төлдөггүйгээрээ нэртэй. Тийм байж СӨХ-өөсөө хэрүүл гуйгаад өдөр бүр суучихдаг гэнэ. Эрх+Үүрэг.

Орцныхоо хэмжээнд гаргадаг тэдний авир нэг иймэрхүү. Өдөр тутам үзүүлдэг үйлдэл нь нэг л тийм сөрөг.

Бас болоогүй ээ, улсын хэмжээний асуудалд улангасан бас оролцох дуртай. Улс нь зүтгээд л байхад "Ийм улсад төрсөн нь гутамшиг" гэж ялархахын сацуу Английг гоё гэж биширнэ, Австралийг тансаг гэж шүтнэ. Гэхдээ тэнд очиж аяга угааж жижигрэхгүй гэсэн сэхүүн бодолтой.

Вакцин гэдэг хорыг биедээ шахуулахгүй гээд хэдэн сар чарлалдаж, хажуу дахь хүн бүрээ турхираад байсан нөхөд өнөөдөр хөтлөлцөж очоод шахуулчихсан зогсч байна гэнэм. Бас болоогүй ээ "Спутник-V байна уу, Пфайзер л байвал сайн байна" гэчихсэн эмчийг зовоосон сурагтай. Тэдний гаргадаг мөнхийн негативийг мэддэг орцныхон нь "Гүй ээ мөн тэнэг улс юм аа" гэж элгээ хөштөл дооглодгийг даанч тэд мэдэхгүй, мэдэрдэг ч үгүй гэмтэй.

Эртээд халамжийн тогтолцооны талаар нэлээд агсамнаж байна лээ. Чих тавиад сонссон чинь "Ганц сая төгрөг цацаж чадахгүй новшийн төр" гэж хилэгнэж байна. "100К-г ч шидэх чалхгүй сдакууд" гэж самганаж байна шүү. Нэхээд, мөн басаад байсан 100К-г нь засгаас маргааш нь 300К болгоод өгсөн чинь "Хээ цэс. Энэ жаахан юмаар бид яаж амьдрах юм" гэж голж байна. Бас ч болоогүй "Ингээд л мөнгө тарааж инфляц өсгөдөг малнууд шүү" гэж бүр эсрэгээр дэмийрч байна.

Илүүдээ гарсан хөрөнгөтэй улс уу гэтэл нөхөр нь харьяалагдах ажил үгүй бүтэн жил гэртээ хэвтэж. Эхнэр нь байнгын барьцдаг, мөнхийн хэл ам таталдаг хэргээр хэдэн сарын өмнө ажлаасаа кусуулж. Түүний араншинг хамт олон нь "Дутуугийн комплекс" гээд бүр тодорхойлчихож. Харин бусдад жөтөөрхөөд үхчих гээд байдаг нөхрийнх нь занг филисофийн шинжлэх ухаан "Сальерийн синдром" хэмээн оношлосон байх. Ийм ч учраас энэ залуу ажил хайх дургүй аж, яаг "Баярлалаа Ээжээ"-гийн Баярмагнай шиг. Яагаад гэвэл "Над шиг төгс хүн ажил хайдаггүй юм" гэсэн хатуу бодолтой. Ийм типийн улсыг "Нарцисс" гэнэ.

Ухаантай улсын ухааны уужуу нь гүйцэгддэггүй, юу хүсээд байгаа нь бүр ч гүйцэгдэхгүй гэдэг энэ ажаму.

Сошиал ертөнц дэх постчдын бодит амьдралд хөрвөсөн төрх нэг иймэрхүү.

ЖАЛСРАЙН БАЯРЖАРГАЛ