Коронавирусийн халдвар эрчимтэй тархаж байгаа энэ үед засгийн газраас дөрөвдүгээр сарын 3-15 хүртэлх хугацаанд зарим салбарын үйл ажиллагааг хязгаарласан билээ. Үүнд амралт, сувиллын газар багтаж буй. Гэтэл амралт, сувиллын газар хязгаарлалтын дэглэмээ зөрчиж, ямар ч хяналтгүй ажиллаж байна. Тодруулбал, Налайхын “Мөнх Тэрэлж” амралтын газарт энэ сарын 4-5 шилжих шөнө залуус нэгнийхээ төрсөн өдрийг тэмдэглэж архидан согтуурч, эцэстээ маргалдан нэгнийхээ аминд хүрсэн харамсалтай хэрэг гарлаа. Энэ бол нэг л жишээ. Үүний цаана маш олон байгууллага хязгаарлалтын дэглэмээ зөрчиж үйл ажиллагаагаа явуулж байгааг үгүйсгэх аргагүй. Эдгээрт ямар байгууллага нь хяналт тавьж ажиллаж байгаа нь тодорхой бус, эмх замбараагүй байна.

Хэрэв хөл хорио, хязгаарлалтын дэглэм зөрчвөл яах вэ?

Зөрчлийн тухай хуулийн 5.13-т зааснаар хэрвээ иргэн, хуулийн этгээд Гамшгаас хамгаалах хууль зөрчвөл дараах хариуцлагыг хүлээнэ.

1. Гамшиг, аюулт үзэгдэл, халдварт өвчин, осол, аюулын үед энэ талаар олон нийтийг төөрөгдүүлэх, худал мэдээ, мэдээлэл түгээсэн нь эрүүгийн хариуцлага хүлээлгэхээргүй бол хүнийг таван зуун нэгжтэй тэнцэх хэмжээний төгрөгөөр, хуулийн этгээдийг таван мянган нэгжтэй тэнцэх хэмжээний төгрөгөөр торгоно.

2. Гамшиг, аюулт үзэгдэл, халдварт өвчин, осол, аюулын үед эрх бүхий байгууллагаас тогтоосон хорио цээр, хөдөлгөөний хязгаарлалт, тэдгээрийн дэглэм зөрчсөн, эсхүл саад учруулсан нь эрүүгийн хариуцлага хүлээлгэхээргүй бол хүнийг таван зуун нэгжтэй тэнцэх хэмжээний төгрөгөөр торгох, эсхүл долоогоос гуч хоногийн хугацаагаар баривчлах шийтгэл оногдуулах, хуулийн этгээдийг таван мянган нэгжтэй тэнцэх хэмжээний төгрөгөөр торгоно.

3. Гамшиг, аюулт үзэгдэл, халдварт өвчин, осол, аюулын үед эрх бүхий байгууллагаас өгсөн мэдээ, мэдээллийг үнэ төлбөргүйгээр, саадгүйгээр мэдээлэх үүргээ биелүүлээгүй бол хуулийн этгээдийг таван мянган нэгжтэй тэнцэх хэмжээний төгрөгөөр торгоно.

4. Гамшгаас хамгаалах талаар хуулиар хүлээсэн үүргээ биелүүлээгүй бол хүнийг нэг зуун нэгжтэй тэнцэх хэмжээний төгрөгөөр, хуулийн этгээдийг нэг мянган нэгжтэй тэнцэх хэмжээний төгрөгөөр торгоно.

5. Гамшиг, аюулт үзэгдэл, осол, аюул, гамшгийн эрсдэлээс хамгаалах зорилгоор байгуулсан барилга байгууламжийг эвдэж гэмтээсэн, эсхүл зориулалтыг дур мэдэн өөрчилсөн нь эрүүгийн хариуцлага хүлээлгэхээргүй бол учруулсан хохирол, нөхөн төлбөрийг гаргуулж хүнийг таван зуун нэгжтэй тэнцэх хэмжээний төгрөгөөр, хуулийн этгээдийг таван мянган нэгжтэй тэнцэх хэмжээний төгрөгөөр торгоно.

6. Тусламж үзүүлэгч хуулиар хориглосон үйл ажиллагаа явуулсан бол хүнийг нэг зуун нэгжтэй тэнцэх хэмжээний төгрөгөөр, хуулийн этгээдийг нэг мянган нэгжтэй тэнцэх хэмжээний төгрөгөөр торгоно.

Дээрх торгууль, шийтгэл нь эрүүгийн хариуцлага хүлээлгэхээргүй бол оногдуулах арга хуулийн хариуцлага гэдгийг энд дахин сануулъя.