Дэлхийн эрүүл мэндийн байгууллага гуравдугаар сарын 12-ны өдөрт Жансен (Johnson & Johnson) компанийн гаргасан COVID-19-ийн эсрэг “Ad26.COV2.S” вакциныг яаралтай горимд хэрэглэхийг зөвшөөрсөн жагсаалтад бүртгэлээ.

Тус вакциныг хэрэглэх зөвшөөрлийг Европын эмийн агентлагаас (European Medicines Agency EMA) гуравдугаар сарын сарын 11-нд олгосон юм. 

Жансены вакцин нь ДЭМБ-д бүртгэгдсэн анхны нэг тунгийн горимтой хэрэглэх вакцин юм. Жансен компанийн зүгээс өргөн хүрээнд явуулсан туршилт судалгаагаар тус вакциныг өндөр настангуудад хийхэд үр дүнтэй болохыг харуулжээ. 

Вакциныг -20 хэмд хадгалах ёстой боловч 2-8 хэмд гурван сарын хугацаанд хадгалж болох бөгөөд хадгалах хугацаа нь хоёр жил юм. Олон улсын КОВАКС хөтөлбөрийн хүрээнд тус вакцинаас 500 сая хүн тунг худалдан авахаар захиалжээ. 

ДЭМБ-аас коронавирусийн эсрэг бүтээгдсэн дөрвөн /Moderna, Pfizer/BioNTech, AstraZeneca, Johnson&Johnson /вакцинд яаралтай горимоор эмнэлзүйд хэрэглэх зөвшөөрлийг олгоод байгаа юм. 

Өчигдөр Европын холбооны 10 орчим улс “AstraZeneca” вакцин тариулсан зарим хүнд цусны бүлэгнэл үүсч, улмаар нас баралт бүртгэгдсэн гэсэн мэдээллээс үүдэж, тус вакцинаар хүн амаа дархлаажуулах ажлыг түр зогсоосон.

Харин энэ асуудалтай холбоотойгоор ДЭМБ-аас “AstraZeneca” вакцины аюулгүй байдлыг дахин нягталж, судална гэдгээ мэдэгдсэн. Гэхдээ ДЭМБ-аас цусны бүлэгнэл нь вакцинтай шууд холбоотойг дүгнэх нотлох баримт хангалтүй байгаа бөгөөд “AstraZeneca” вакцин нь хамгийн олон хүн дээр туршигдаж, аюулгүй үр дүнг үзүүлсэн гэдгийг тодотгосон байна. 

Эх сурвалж: Өглөө.мн