Цөөн үгээр:

Үр дүнгийн 80% нь хичээн зүтгэлийн 20% -с бий болдог

Жишээнүүд:

• Компаний ашгийн 80% нь нийт бүтээгдэхүүний 20%-с бүрддэг
• Борлуулалтын ашгийн 80% нь нийт маркетингийн 20%-ийн үр дүн
• Шалгалт дээр 80% дүн авахад 20% бэлтгэл шаарддаг (харин 100% авахын тулд үлдсэн 80%-ийн хичээн зүтгэл шаардагдана)
• Байгууллагын амжилтын 80% нь нийт ажилчдын 20%-с шалтгаалдаг
• Нийт авто ослын 80%-д нийт жолоочийн 20% буруутай байдаг
• Нийт гэмт хэргийн 80%-ийг нийт гэмт хэрэгтнүүдийн 20% үйлддэг
• Хүн нийт хувцасныхаа 20%-ийг нийт цаг хугацааны 80%-д өмсдөг
• Хүн танилын хүрээний 20%-тэй нь нийт цаг хугацааны 80%-г өнгөрүүлдэг
• Инстаграм дээр нийт “like”-ийн 80% нь зургийн 20% дээр л дарагддаг
• Гэх мэт… (өөр ямар жишээ амьдрал дээр ажилглаж байсан бэ?)

80/20-ийн дүрэм хаанаас гаралтай вэ?

1906 онд Италийн эдийн засагч Вильфредо Парэто нь Италийн нийт газар нутгийн 80%-ийг хүн амын 20% нь эзэмшиж буйг ажигласан. Энэ тэгш бус хуваарилалтын зарчим нь өөр салбаруудад хэрэгждэг эсэхийг судалж, үйлдвэрлэлийн ашгийн 80% нь борлуулалтын 20%-иас бүрддэг гэдгийг тогтоосон юм. Энэ Парето зарчмыг илүү өргөнөөр авч үзвэл, аливаа үр дүнгийн 80% нь хичээн зүтгэлийн 20%-с бий болдог гэдгийг тогтоож 80/20-ийн дүрэм бий болсон юм.

80/20-ийн дүрмийг ажил, амьдралдаа хэрхэн ашигтайгаар хэрэгжүүлж болох вэ?

80/20-ийн дүрмийг та ойлгосноор цаг, мөнгө, энерги гэх мэт хүчин зүйлсээ илүү үр дүнтэй зарцуулдаг болж болно. Үүний тулд 80/20-ийн дүрэм таны амьдрал дээр хэрхэн хэрэгждэгийг ойлгох хэрэгтэй.

• Ажлын өдөр/ долоо хоног/ улирал/ жилийг аваад үз:
  Юунд цагаа зарцуулдаг вэ? Тэрийгээ гол үр дүн, амжилттайгаа харьцуулаад үз.
  - Үр дүнгийн 80% нь хийсэн ажлуудын аль 20%-с бүрддэг юм байна?
  - Үлдсэн 80%-д нь юу хийж, ямар үр дүн гаргадаг вэ?
  - Огт хийхгүй байж болох, эсвэл бага цаг зарцуулж болох ажлууд байна уу?
  Хэмнэсэн цагаа хийе гэж бодож байсан хэрнээ огт амждаггүй байсан ажлууддаа зарцуулж болно. Эсвэл магадгүй ажилдаа дарагдаад завгүй ажилладаг байсан бол өөртөө зарцуулах цаг гаргаж болно.

Миний хувьд ажлын өдөр маань мэдээлэл цуглуулах, мэдээлэл боловсруулах, мэдээлэл хүргэх гэж гурван ерөнхий ангилалтад хувааж болно. Мэдээлэл цуглуулах гэдэг нь хүмүүстэй уулзаж, утсаар ярих, имэйл бичих, судалгаа хийх, гэх мэт хэлбэрээр явагдана. Мэдээлэл боловсруулах гэдэг нь мэдээлэл дээр анализ хийж, хүнд хүргэхэд бэлэн хэлбэрт оруулах (жишээ нь Microsoft Excel, PowerPoint гэх зэрэг програмуудыг ашиглаж). Мэдээлэл хүргэх гэдэг нь боловсруулсан мэдээллээ хэрэгтэй хүмүүст нь танилцуулга хийж түгээх (“presentation” тавих).

Анх ажилдаа ороод миний ажлын цагийн дийлэнх нь мэдээлэлэл цуглуулах, мэдээлэл боловсруулахад зарцуулагддаг байсан — ялангуяа интернэт дээр юм судлах, PowerPoint дээр танилцуулга бэлдэхэд өнгө, үзэмж дээр нь ажиллах. Харин дүгнээд үзэхэд хамгийн чухал ажлууд маань мэдээллээс шинэ ойлголтууд олж харах, шинэ юм сэтгэх, хэрэгтэй асуудлууд олж хөндөх гэх мэт. Тийм учраас би тэрэндээ илүү цаг зарж, онц шаардлагагүй ачаалал өөртөө авахгүйн тулд гол санаануудаа төвлөрөн гаргаж, дүрслээд, судлах асуудлуудыг судалгааны багтаа хуваарилж, танилцуулгын өнгө үзэмжийг график дизайны багтаа хуваарилдаг болсон. Тэгээд бодоод байсан чинь байгууллагадаа ахих тусам ажиллагаа ихтэй зүйл дээр цаг зарах нь улам багасч, шийдэл олж, шийдвэр гаргах дээр хамаг цагаа төвлөрүүлдэг болдог. Тийм л учраас нийт орон тооны 20% (дарга нар) нийт цалингийн 80%-ийг авдаг байхдаа, хэхэ.

Ажлаас гадна, мөнгө, чөлөөт цаг, иддэг хоол, уулздаг хүмүүс гэх мэт зүйлсээ ийм маягаар дүгнээд үзвэл ямар ажиглалтуудыг хийж болох вэ? Ямар өөрчлөлтүүдийг гаргаж илүү үр дүнтэй байж болох вэ?

 

Эх сурвалж: Blogger Tana Jambaldorj