Төрөлтийн тоогоороо дэлхийн улс орнуудаас хамгийн доор бичигдэж байгаа тус улсын хувьд хүн амынх нь тоо цөөрч байгаа нь маш том асуудал болоод байна. Үүнтэй холбоотойгоор БНСУ-ын Дотоод хэргийн яам хүн амын бодлогоо "үндсээр нь өөрчлөх" шаардлагатай байгаа тухай онцолжээ. Хөдөлмөрийн насны иргэдийн тоо цөөрснөөр хүний нөөцийн хомсдол үүсч, тус улсын эдийн засагт сөргөөр нөлөөлж байна. Өнгөрсөн сард Өмнөд Солонгосын Ерөнхийлөгч Мүн Жэ Ин хүн амын дундах төрөлтийн тоог нэмэгдүүлэхэд чиглэсэн хэд хэдэн хуулийн төсөл баталсан юм.

Үүнд 2022 оноос эхлэн шинээр төрсөн хүүхэд болгонд нэг удаадаа 2 сая вон, 1 нас хүртэл нь сар бүр 300 мянган вон олгох тухай мөн 2025 оноос 1 хүртэлх насны хүүхдэд сар бүр олгох мөнгөний хэмжээ 500 мянган вон болгох тухай тусгасан байна. БНСУ-д хүн амых дундах төрөлтийн тоо бага байгаа нь хэд хэдэн шалтгаантай бөгөөд хамгийн том шалтгаан нь Өмнөд Солонгосын эмэгтэйчүүдэд ажил амьдралаа тэнцвэртэй авч явах боломж маш бага байдагт оршдог байна. Гэр бүлийн амьдрал зохиож, давхар карьераараа өсөн дэвжих боломж хомс учраас эмэгтэйчүүд гэр бүлтэй болох, хүүхэд төрүүлэхээ хойш тавих нь элбэг байдаг байна.

Түүнчлэн үл хөдлөх хөрөнгийн үнэ тасралтгүй өсч байгаа нь хосуудын гэр бүл зохиох урам зоригийг мохоодог байна. Хүүхэдтэй болохын тулд хосууд өөрийн гэсэн орон байртай болох ёстой. Гэтэл энэ нь Өмнөд Солонгост биелэгдэшгүй мөрөөдөл болоод байгааг Өмнөд Солонгосын залуус онцолж байна. Түүнчлэн хүүхэд өсгөхөд маш их хүч хөрөнгө зарцуулагддаг. Засгийн газрын зүгээс хүүхдүүдэд 1 нас хүртэл нь мөнгө олгож байгаа нь асуудлыг шийдэж чадахгүй хэмээн зарим нь үзэж байна.

Эх сурвалж: BBC