Дөрөв хоног карентилаад асуудлыг шийдэж чадна гэж үү?
4 хоног хөл хориог сунгав. Ирэх даваа гарагаас амьдрал хагас хэвийн болно гэв. Тэгснээ ... Хэрвээ энэ дөрвөн хоногт шинэ голомт энэ тэр илэрвэл бүр чангалж хорино гэв. Эргээд санацгаая ! Миний санахын хөдөлгөөн хааж хатуу хөл хорио эхэлсэн өдөр бол 2020 оны 11 сарын 10 юм.
Тэр үед өнөөдрийнх шиг өдөрт 20,30-аараа илэрч эхлээгүй байлаа. Түүнээс хойш 54 хонож байна. Яг ний нуугүй хэлэхэд өнгөрсөн 54 хоногт ямар ч хөл хорио байгаагүй. Зүгээр л ажлын байрууд хаагдаж хүмүүс орлогогүй хийх юмгүй болж баар саванд биш орон байраараа дамжиж архи уун, өөрийнхөө биш QR-тай танилынхаа унаагаар зорчсон. Хүсвэл архийг хэн ч хаанаас ч олж болж байсан. Хүргэлтээр хүртэл дуудаад авчихна.
Зүгээр л арай илүү үнэ төлнө түүнээс хорио, хязгаарлалт бол байгаагүй. PCR гэдэг шинжилгээг дөнгөж өгч дуусаад гэртээ харилгүй буцаад хавьтчих магадлал 100 хувь. Өнөөдөр ганц нэгхээн хүний жишээгээр дөрөөлж иргэдийгээ тэвчээргүй, хариуцлагагүй гэж хэлж огт болохгүй. Тийм хүмүүс бүх цаг үед байж л байсан. Хамгийн анх бүгд л УОК-нхоо шийдвэрийг дагна аа л гээд үнэнч дагаж байсан.
Толгой эргүүлсэн маш олон хөл хорио сунгалт, ийм тийм байгууллага гэсэн ялгавартай шийдвэрүүд, 3 хоногийн насгүй шийдвэр цуцлалтууд, давхар улс төрийн тоглолтууд, давуу эрх олголт дагаж үүссэн шагийн бизнес, гоморхол тунирхал загналтууд... Энэ бүхэн чинь үнэхээр гай боллоо шүү дээ, заримдаа коронагаас биш та нарын огцом тэнэгтлээс айх...
Бүүр хамгийн анх 11.10-нд хүмүүс ядаж жаахан хуримтлал, амьтайгаа байхад нь жинхэнэ утгаараа Lockdown буюу тэр яриад байгаа ТЭГ зогсолтоо 20 хоног хийгээд 12.01-с нам дараад авсан бол сунжирсан энэ олон асуудал байх байсан болов уу гэдэг бодол өөрийн эрхгүй төрж байна. Дандаа л ийм голомт илэрчээ тэр хүн нь тийм олон газраар явжээ гэсэн урт урт жагсаалтууд... 4 хоногийн дараа буюу маргаашийн зөрүү нь юу вэ?
Голомт угаасаа л энэ 4 хоногт илрэх магадлал маш өндөр. Тэгэхээр нь яах юм бэ? 10 хоног сунгах юм уу? Эцсийн бүлэгт өнөөдөр оруулсан 14 хоног гэдэг саналаа хоёр хувааж биднийг тайвшруулж байгаа юм уу? УОК, ЗАСАГ хоёр чинь нэг л зүйл шүү дээ. Ер нь зүгээр л алдчихсан юм биш үү ? Хэрвээ тийм байгаад түүнээ эртхэн хүлээн зөвшөөрч хэлээгүй тохиолдолд энэ бараг эрүүгийн хариуцлага хүлээх гэмт хэрэг биш үү?
Хүн байтугай шувуу хүртэл байгаа хоолны нөөцөө тооцоолоод хэдэн ангаахайдаа яаж хувааж өгөх, яаж өвлийг давахаа төлөвлөдөг. 4 хоног, 7 хоног, 10 хоногийн чинь цаана хэдэн зуун мянган ээж, аав амьдралаа хүүхдийнхээ хоолыг тооцоолж төлөвлөж байгааг мэдэж байна уу ? Та нар өөрсдөө бүр пайнагт орчихсон контроллоо алдчихсан юм биш үү ? Тийм бол тэрийгээ эртхэн хэлээд чаддагт нь шилжүүлээд хурдан маневр хий лдээ ! Энэ удаа ёстой сонгуулийн сонголтын уршгийг утгаар нь харж байна.
Цөөхөн хэдэн бодит байдлыг хэлж байгаа гишүүн, эрүүл ухаантай хүмүүс бий. Даанч хэтэрхий цөөн. МАН-с хэдэн дажгүй залуу гишүүд сонгогдсон энэ бүхнийг харсаар байж бүлх залгисан мэт дув дуугүй, ямар ч ардчилал сөрөг хүчин энэ парламентад алга. Одоо ерөнхийлөгчийн сонгуульд үзэлцэх корона гэдэг том зэвсэгтэй болчихлоо ! 2021 оны 6 сар хүртэл, ерөнхийлөгчийн сонгууль өнгөртөл
ЗАСАГ ЕРӨӨСӨӨ МУУХАЙ ХАРАГДАЖ БОЛОХГҮЙ гэдэг ганц тушаалтай аз жаргалын жүжиг ид дундаа орж байна! Эцсийн асуулт! Би л хувьд төр засгийг удирдаж байгаа хүмүүсийг ТЭНЭГ гэж бол бодохгүй байна, энд тусдаа ашиг сонирхол бий. Та нар үнэхээр асуудлыг шийдэхийг хүсэж байна уу үгүй юу? Шийдэхгүй бөөрөнхийлөх нь хэн нэгэнд тун ашигтай байгаа юм биш үү?
Ч.Ганжавхлан 2021.01.04
