Шилний цаанаас чихэр долоолгож, сэтгэлийг нь цатгаад сурсан улс даа энэ улс төрчид...
6 хан сарын өмнө Монгол улс ДЭМБ-ийн үлгэр жишээ улс болж, дэлхийд шагшигдаж байлаа. Арга ч үгүй биз. Уханьд байдал эвгүйтэнгүүт улсаа хаагаад, хүмүүсээ хорьчихсон юм хойно.
Дотооддоо алдаагүй улс дэлхийгээс тусгаарлагдчихаар арга ч үгүй биз. Хавар ард түмнээс авсан оноогоороо зун сонгуульд яллаа, намар хүртэл шахам найрлалаа манай засаг.
Одоо харин яаж байна. Өдөр тутам шинэ хавьтал. Хөл хориог 3 дахин сунгалаа, хүлцэнгүй иргэд гэртээ хүлээсээр. . . Архи дарс хорилоо, ажил орлого хаалаа. Төрдөө итгэж иргэд нь хичээсээр. . . Хилийн боомт Сэлэнгэ, ХӨСҮТ, ХСҮТөвөөсөө халдвар алдчихаар маниус мянга хичээх нь зөв ч юмуу даа.
Сүүлдээ задраад авто худалдааны төв, автобус бааз, айлын байрнаас илрээд ч байх шиг. ОБЕГ, НОБГ, УОК ийн дарга нар нь мэдээлэл хийхээрээ иргэдийн хайхрамжгүй, хайнга байдлаас болж байна гэж дарамтлах үүрэгтэй. Хотын дарга нь иргэддээ тунирхаж, засгийн сайд нар нь сошиал хандлагад тааруулж бөөрөнхийлнө.
QR хэмээх онцгой шаардлага бүхий 15 хан салбартаа олдохгүй байгаа автомашины тусгай эрх бүх л эрх мэдэлтнүүдэд үнэгүй очоод байгаа юм биш биз. Эмнэлэгийн бичиг, ажлын онцгой шаардлагаар олгосон гэх цохолт энэ тэртэй, танил талтай бүхэнд карантин яг шударга үйлчилж чадаж байна уу. . . Талхандаа гарсан иргэн гэр лүүгээ буцаж хөөгдөнө. Тархи угаах засгийн тоглолт дээр тавь жар байтугай хүн цуглана.
Байдгаа барсан иргэдийн тэсрэхэд бэлэн бухимдлыг хааш нь чиглүүлэхээ бол энэ засаг харин ч сайн мэднэ л дээ. Төр унтаж амрахгүй зүтгэж байна, заваарсан хэдхэн хүнээс болж засгийн хичээлт талаар болж байна гэж хоолой зангируулах. Масс тэгэнгүүт гаднаас үхэхийн даваан дээр нутагтаа ирсэн Монголчуудаа харааж зүхнэ. Өвчилсөн хүнийг амьдаар нь сургаар зулгаана. Бодлого шийдвэр нь дандаа урд хормойгоороо хойд хормойгоо нөхсөн, урт насгүй, бөөгнөрүүлж бүртгэдэг, бөглөж тагладаг, өнөөдөр шийдэж маргааш цуцалдаг байхаар яаж ч мэргэн байх вэ дээ. Хомсдол дээр шавуулна. Хоолон дээр алалцуулна. . .
Гол нь энэ олон мянган эмч сувилагч, цэрэг цагдаа, онцгой байдлынхан зэрэг өдөр шөнөгүй ажиллаж буй хүмүүсийн олон сарын хүнд хөдөлмөр талаар болох вий дээ. Төрийн ордны PCR шинжилгээ 3 цагт гарчихдаг, орон нутгийн гацагсад 3 өдөр хариугаа хүлээдэг зэрэг шударга бус зүйлсээ л боличхооч.
Үзэлт ихтэй сайтууд нь пиво уусан ганц иргэнийг байцаасан сүр мэдээгээ сэвэх үүрэгтэй. Иргэд бид биесээ муулж, хагаралдаж, халдвар авсан айлын хаалгыг өшиглөж, дотроо хэмлэлдэж, сошиалаар солиорох тусмаа сайн.
Шилний цаанаас чихэр долоолгож, сэтгэлийг нь цатгаад сурсан улс даа энэ улс төрчид. . . Шат дараалж бүх иргэдээ шинжилгээнд оруулж яагаад болоогүй юм бэ? Энэ урт хорионы хугацаанд. Мэргэжлийн байгууллагууд маш сайн ажиллаж байгаатай хэн ч маргахгүй.
Гэхдээ амыг нь таглаад хүчийг нь бараад байгаа юм биш биз. Одоо тэгээд сонгууль хүртэл дотоодод нэмэгдэж байна гэж айлгачихаад, мөлхөж буй иргэдээ хэвтүүлэх юм биз дээ. . . Халдвар тарах, дотооддоо алдах эрсдлүүд гаргасан хууль тогтоомж, шийдвэр, ажлын арга барил, удирдан зохион байгуулалтаас чинь болоод байгаа юм биш биз дээ! Мэргэн төр минь ээ!!
Эх сурвалж: Фэйсбүүк
