Хятадын эдийн засаг сүүлийн хэдэн 10 жилд огцом өссөнөөр иргэдийнх нь амьдралын хэв маяг, хооллолт, дасгал хөдөлгөөнд мэдэгдэхүйц өөрчлөлт гарсан аж. Илүүдэл жин нь олон төрлийн өвчин эмгэгт өртөх эрсдлийг нэмэгдүүлдэг ба зүрхний эмгэг, зүрхний шигдээс болон чихрийн шижингээр өвдөх үндэс суурь болдог байна. Өнгөрсөн 10-р сард Хятадын засгийн газар илүүдэл жинтэй иргэдийн тоог бууруулахад чиглэсэн төлөвлөгөөгөө танилцуулсан билээ. Илүүдэл жингийн асуудал коронавирусын цар тахлын үеэр олон нийтийн анхаарлыг илүү ихээр татах болсон юм.

Учир нь илүүдэл жинтэй, тарган хүмүүс коронавирусын халдвараар илүү хүнд өвдөх, өвчин нь хүндрэх эсвэл нас барах явдал эрсдэл өндөртэй байгааг эрдэмтэд тогтоогоод байгаа билээ. Хятадын Үндэсний Эрүүл мэндийн зөвлөлийн мэдээлснээр насанд хүрэгчдийн 50 гаруй хувь нь жингийн илүүдэлтэй, үүнээс 16.4 хувь нь таргалалттай гэсэн ангилалд багтжээ. Жингийн илүүдэлтэй иргэдийн тоо огцом өссөн нь хөдөлгөөний хомсдолтой шууд холбоотой ба Хятадын насанд хүрэгчдийн ¼ орчим хувь нь долоо хоногтоо багадаа 1 удаа дасгал хөдөлгөөн хийдэг нь судалгаагаар тогтоогджээ. Түүнчлэн хоолондоо мах түлхүү хэрэглэж, жимс ногооны хэрэглээ нь багассан нь илүүдэл жинтэй иргэдийн тоо өсөх бас нэг шалтгаан болоод байгаа аж.

Харбин хотод ажилладаг хоол зүйё Ван Дан Ройтерс агентлагт өгсөн ярилцлагадаа хятадуудын дийлэнх нь "дасгал хөдөлгөөн маш бага хийж, маш их дарамтанд амьдарч, маш олон цагаар ажиллах болсон" гэдгийг онцолжээ. Илүүдэл жинтэй иргэдийн тоо өсч байгаа улс орнуудын тоо жил ирэх тусам нэмэгдэж байгаа билээ. ДЭМБ-аас мэдээлснээр дэлхий даяар таргалалттай иргэдийн тоо 1975 оноос хойш 3 дахин өссөн үзүүлэлттэй гарсан ба дийлэнх нь ядуу буурай болон дунд орлоготой орнуудад бүртгэгджээ.

2016 оны ДЭМБ-ын судалгаагаар дэлхийн хүн амын 40 орчим хувь нь илүүдэл жинтэй, үүнээс 13 хувь нь таргалалттай гэж гарсан байна. Катар улсад л гэхэд хүн амынх нь 70 гаруй хувь нь илүүдэл жинтэй болох нь судалгаагаар тогтоогджээ.

Эх сурвалж: Bbc