Дэлхийн орнуудын дунд Хятадын нэр хүнд унасан нь судалгаагаар тогтооджээ
АНУ-д төвтэй "Pew" судалгааны төвөөс дэлхийн 14 орны дунд явуулсан судалгаагаар өнгөрсөн 1 жилийн хугацаанд АНУ болон бусад олон өндөр хөгжилтэй орнуудад Хятадад хандах таагүй хандлага эрс нэмэгдсэн болохыг тогтоожээ.
Энэ оны зургадугаар сараас наймдугаар сар хүртэл явуулсан тус санал асуулгад оролцсон орнуудын дийлэнх нь Хятадын талаар таагүй бодолтой байгаа нь тогтоогджээ. Тус хүрээлэн нийтдээ 14 орны 14,276 насанд хүрэгчдийн дунд санал асуулга явуулсан юм.
Австрали, Их Британи, Герман, Нидерланд, Швед, АНУ, Өмнөд Солонгос, Испани, Канадад арав гаруй жилийн өмнө "Pew" энэ сэдвээр санал асуулга явуулж эхэлснээс хойш сөрөг үзэл бодол хамгийн өндөр түвшинд хүрсэн байна.
Худалдааны дайн, коронавирус, Хятадын "Huawei" зэрэг томоохон технологийн компаниудын барууны эдийн засаг дахь үүрэг оролцоо нэмэгдсэнээс үүссэн хурцадмал байдал улам бүр нэмэгдсээр байгаа нь ийнхүү олон нийтийн санал бодолд нөөлөөлсөн гэж судлаачид үзжээ.
Үүнээс болоод 5G сүлжээ үүсгэхэд "Huawei"-тэй хамтарч ажиллахаас Их Британи, Австрали зэрэг орнууд таттгалзаад байгаа нь нөхцөл байдлыг улам хүндрүүлсэн гэнэ.
"Pew"-ийн тайланд судалгаанд хамрагдсан хүмүүсийн 61 хувь нь Хятад улс өвчний дэгдэлттэй холбоотой ажлыг муу хийсэн гэж хариулсан бол 37 хувь нь сайн ажилласан гэж үзжээ.
Судалгаанд хамрагдагсдаас АНУ-ын иргэд Хятадын эсрэг хамгийн үнэлгээ өгсөн бөгөөд дунджаар 84 хувь нь Хятад дэгдэлтийн эсрэг ажиллагааг муу зохицуулсан гэж хариулжээ.
Бээжингийн цартахлын эсрэг авсан арга хэмжээ хүмүүсийн Хятадын талаархи ерөнхий ойлголтыг өөрчилж, муу ажилласан гэж үзсэн хүмүүс тус улсын талаар таагүй үзэл бодолтой болсон магадлалтай гэж тайланд дурджээ.
Хүмүүсийн БНХАУ-ын дарга Ши Жиньпинд итгэх итгэл 14 улс даяар буурсан бөгөөд санал өгөгсдийн 78 хувь Ши Жиньпинд чухал асуудал даалгах хүсэлгүй гэж хариулсан байна.
Хятадын коронавирусын дэгдэлтийн хариу арга хэмжээг эерэгээр үнэлсэн хүмүүсийн 10 хүн тутмын дөрөв нь Ши-д итгэдэг гэж "Pew"-ийн тайланд дурджээ.
Ши Жиньпиний нэр хүнд өндөр хэвээр байгаа бөгөөд ихэнх улс орнууд Трампаас илүү түүнд итгэдэг болох нь судалгаагаар тогтоогджээ. Германд санал өгсөн хүмүүсийн 78 хувь нь Ши-д итгэхгүй байна гэж хариулсан боловч түүнээс илүү буюу 89 хувь нь Трампд итгэхгүй байна гэж хариулсан аж.
Эдийн засгийн хүч чадлын ойлголтын тал дээр Хятад харьцангуй илүү байсан бөгөөд зөвхөн АНУ, Япон, Өмнөд Солонгост л Америкийг дэлхийн эдийн засгийн тэргүүлэгч гүрэн гэж үздэг хүмүүс олон байв.
Судалгаанд хамрагдсан орнууд нь Австрали, Бельги, Их Британи, Канад, Дани, Франц, Герман, Итали, Япон, Нидерланд, Өмнөд Солонгос, Испани, Швед, АНУ юм.
Эх сурвалж: The Guardian
