Беларусийн сөрөг хүчний удирдагчийг багтай этгээдүүд авч явжээ
Өнгөрсөн даваа гарагийн өглөө Беларусийн нийслэл Минскт багтай этгээдүүд сөрөг хүчний удирдагч Мария Колесниковаг микро автобус руу хүчээр суулган, авч явжээ.
Мария Колесникова өнгөрсөн сарын 9-нд болсон Ерөнхийлөгчийн сонгуульд Ерөнхийлөгч А. Лукашенкотой өрсөлдсөн нэр дэвшигч Светлана Тихановская дэмжин ажиллаж байсан ба тэрээр Беларусийн сөрөг хүчний томоохон төлөөлөл болсон 3 эмэгтэйн нэг юм. Тuт. By нэртэй цахим мэдээллийн хуудсанд бичсэнээр гэрчүүд Мария Колесниковаг Минск хотын төвд гудамжинд энгийн хувцастай баг зүүсэн этгээдүүд хар бараан өнгийн микро автобус руу хүчээр чихэж байгааг харжээ.
Беларусийн сөрөг хүчний зөвлөлөөс мэдээлж байгаагаар Мария Колесниковаг баг зүүсэн этгээдүүд хүчээр авч явсаны дараахан сөрөг хүчний хоёр ч төлөөлөгч ор сураггүй алга болсон байна. Сөрөг хүчнийхэн эдгээр хэргүүдийн ард эрх баригчид байгаа хэмээн үзэж буйгаа илэрхийлжээ. Ерөнхийлөгчийн А. Лукашенког эрс шүүмжлэгчдийх нэг гэгддэг Мария Колесникова Ерөнхийлөгчийн сонгуулийн үр дүнг эсэргүүцсэн иргэдийн жагсаал цуглаанд томоохон үүрэг гүйцэтгэж байсан юм. Өнгөрсөн 26 жил Беларусийн төрийн эрхийг барьсан А. Лукашенкогийн хувьд сонгууль шударга болсон хэмээн, гадны хүчнүүд түүнийг унагахыг оролдож байна хэмээн мэдэгдсэн юм. А. Лукашенког иргэдийн эсэргүүцлийн жагсаал цуглааныг хүчээр дарахыг оролдож байна хэмээн барууны улс орнууд буруушааж байгаа ба жагсаалын үеэр баривчлагдсан иргэдийг хууль сахиулагчид зодсон, тамлан зовоосон тохиолдлууд ч бүртгэгдээд байгааг онцолж байна.
Европын холбоо Беларусийн Дотоод хэргийн сайд болон Беларусийн төрийн 30 албан тушаалтанд эдийн эдийн засгийн хориг тавихаар зэхэж байгаа талаар эх сурвалжууд мэдээлжээ.
Барууны орнуудаас хатуу шүүмжлэл хүртээд байгаа Ерөнхийлөгч А. Лукашенкод ОХУ-ын Ерөнхийлөгч Владимир Путин тусламж дэмжлэг үзүүлнэ гэдгээ илэрхийлээд байгаа билээ. Сөрөг хүчний удирдагч Мария Колесниковаг хулгайлснаараа Беларусийн эрх баригчид иргэдийн эсэргүүцлийн хөдөлгөөнийг дарж, сөрөг хүчний үйл ажиллагааг боогдуулахыг оролдож байна хэмээн сөрөг хүчнийхэн үзэж байна.
Ерөнхийлөгчийн сонгуулийн үеэр Мария Колесникова Ерөнхийлөгч А. Лукашенкогийн эсрэг нэр дэвшигч Светлана Тихановская болон сөрөг хүчний төлөөлөгчид болох Вероника Цепкало, Ольга Ковалькова нартай хүчээ нэгтгэсэн билээ. Сонгуулийн үр дүн гарснаас хойш нэр дэвшигч С. Тихановская Литва руу, Вероника Цепкало болон Ольга Ковалькова нар Польш руу зугтсан ба Мария Колесникова сөрөг хүчний эмэгтэй удирдагчдаас ганцаараа Беларуст үлдээд байсан аж.
Өнгөрсөн ням гарагт А. Лукашенког албан тушаалаасаа огцрохыг шаардсан хэдэн 10 мянган иргэд гудамжнаа гарч жагссан ба жагсаалын үеэр цагдаа нар 633 хүнийг баривчилжээ. Беларусь дахь улс төрийн нөхцөл байдал тогтворгүй байгаатай холбоотойгоор тус улсын эдийн засгийн нөхцөл байдал ч хүндэрчээ. Беларусийн Төв банкнаас өнгөрсөн даваа гарагт гаргасан тайланд тус улс өнгөрсөн 8-р сард алтны болон гадаад валютын нөөцийнхөө ⅙-ийг буюу 1.4 тэрбум ам. долларыг зарцуулж дууссан болохыг онцолжээ.
Эх сурвалж: Reuters
