А.Навальныйг мэдрэлд нөлөөлдөг “Новичок” гэх ЗХУ-ын үеийн бодисоор хордуулсан нь батлагджээ
ХБНГУ-ын эрх баригчид Оросын сөрөг хүчний удирдагч А. Навальныйг "Новичок"-оор хордуулсаныг батлах "баттай нотлох баримт" байгаа хэмээн мэдэгджээ.
ХБНГУ-ын канцлер Ангела Меркель А. Навальныйг хөнөөхийг оролдсон нь тогтоогдсон хэмээн, дэлхий даяараа ОХУ-аас хариу тайлбар хүлээж байна гэжээ. Өнгөрсөн сард ОХУ-ын Ерөнхийлөгч Владимир Путин болон Оросын эрх баригчдыг шүүмжлэгч, сөрөг хүчний тэргүүн А. Навальныйгийн бие онгоцон дотор гэнэт муудаж, түүнийг Берлин хотын Шарите эмнэлэг рүү шилжүүлсэн билээ. Түүний биеийн байдал хүнд, ухаангүй байгаа юм.
А. Навальныйг дэмжигчид болон сөрөг хүчнийхэн түүнийг Ерөнхийлөгч В. Путины тушаалаар хордуулсан хэмээн сэжиглэж байгаа бол Кремлийн зүгээс ХБНГУ-ын эрх баригчдын мэдэгдлийг ямар ч үндэслэлгүй, ямар ч баримт нотолгоогүй хэмээн мэдэгдээд байна. 2018 онд Их Британид ЗХУ-ын Тагнуулын албанд ажиллаж байсан Сергей Скрипаль болон түүний охин оросуудын гаргаж авсан "Новичок" бүлгийн хорт бодисонд хордсон хэрэг гарсан билээ. Их Британийн тал уг хэргийг ОХУ-ын тагнуулын алба гүйцэтгэсэн хэмээн буруутгаж байсан юм.
Их Британийн Ерөнхий сайд Борис Жонсон А. Навальныйгийн амь насанд халдсан явдлын талаар, "Оросын засгийн газар А. Навальныйд тохиолдсон зүйлийн талаар тайлбар өгөх ёстой. Бид олон улсын түншүүдтэйгээ хамтран шударга ёсыг тогтоох болно." гэжээ.
А. Навальныйгийн шинжилгээний хариу гарсаны дараагаар ХБНГУ-ын канцлер Ангела Меркель, "Хэн нэг нь А. Навальныйг дуугүй болгох гэж оролдсон байна. Германы засгийн газрын нэрийн өмнөөс энэ явдлыг хатуу буруушааж байна." хэмээн мэдэгджээ. Тэрээр НАТО болон Европын холбооны түншүүддээ А. Навальныйд тохиолдсон хэргийн талаар мэдээлсэн ба ОХУ-ын зүгээс хийх тайлбарын хариуд үзүүлэх хамтын арга хэмжээгээ боловсруулж байгаа гэжээ.
Европын холбоо, НАТО болон АНУ-ын Үндэсний Аюулгүй байдлын зөвлөлөөс А. Навальныйд тохиолдсон явдлыг ил тод шалгаж, хэрэгт буруутай этгээдүүдэд зохих шийтгэлийг ноогдуулахыг ОХУ-ын засгийн газраас шаардсан байна. "Новичок" бүлгийн бодисууд нь хүний мэдрэлийн тогтолцоонд нөлөөлдөг ба эдгээр бүлэг бодисыг 1970 болон 1980-аад онд ЗХУ-д гаргаж авчээ. "Новичок" бүлгийн бодисууд нь бусад химийн хорт бодисуудаас хоруу чанар өндөр ба уг хорт бодисын нөлөө хүнд 30 секундээс 2 минутын дотор илэрдэг байна. "Новичок" бүлгийн бодисын нөлөөгөөр мэдрэлийн эсээс булчин руу мэдээлэл дамжуулах явдал зогсдог ба ингэснээр хүний эрхтэн тогтолцоонд доголдол үүсдэг байна. Тус бүлгийн бодисууд шингэн болон хатуу хэлбэртэй байдаг нь хүнийг өөрт нь мэдэгдэлгүйгээр хордуулахад тохиромжтой байдаг аж.
Эх сурвалж: BBC
