Энэтхэгийн Ерөнхий сайдын Үндэсний аюулгүй байдал хариуцсан зөвлөх АжитДовал ба БНХАУ-ын Гадаад харилцааны сайд Ван И нар Ладак дах хилийн асуудлын талаар утсаар ярилцахдаа ийм тохиролцоонд хүрсэн аж.

Хоёр тал нь нэгэнт тогтсон хилийн хяналтыг шугамыг өөрчлөх алхмыг дангаар хийж байхгүй гэж тохиролцсон байна. Мөн зөвшилцөх ажлын бүлгийн хүрээнд цэрэг ба дипломат ажилтнууд нь хилийн асуудлаар бүгдийг хэлэлцэж, хүрсэн тохиролцоогоо цаг тухайд нь биелүүлж байх ёстой гэдэгт санал нийлжээ. Үүнээс гадна маргаантай хилийн бүс нутагт хоёр талаас хуримтлагдсан асар их цэргийн хүчийг аль болох богино хугацаанд буцаан татах ёстой гэж тохиролцсон байна.

Хятад Энэтхэг хоёр нь маргаантай хилийн шугам дагуугаас буюу Ладак дах Галван голын хөндийгөөс цэргүүдээ харилцан холдуулж эхэлсэн, хилийн бүсийн дагуу байгуулсан түр байгууламжуудаа буулгаж эхэлсэн гэдгийг Энэтхэгийн “NDTV” суваг мэдээлсэн байна.

Эргэн сануулахад тавдугаар сарын эхээр Энэтхэгийн Ладак холбооны нутаг дах маргаантай хилийн шугамын орчим Энэтхэг ба Хятадын нийт 250 цэрэг оролцсон зодоон болж, хоёр хоёр талаас 100 гаруй хүн шархадсаны дараа хоёр улсын харилцаа хурцдаж эхэлсэн юм. Энэ явдлаас төд удалгүй буюу зургаадугаар сарын 15-аа 16-нд шилжих шөнө мөн маргаантай хилийн зурвасын орчим хоёр талаас хадаастай мунаа, бороохойгоор зэвсэглэсэн цэргүүд ахин тулж, гардан байлдаан хийсэн.

Үүнээс болж Энэтхэгийн 20 цэргийн албан хаагч алагдаж, 76 нь шархадсан, мөн Хятадын 45 цэрэг алагдаж шархадсан тухай Энэтхэгийн тал мэдээлсэн юм. Үүний дараанаас хоёр тал нь маргаантай бүс нутгийн орчим танк, их буу, олон тооны цэргүүд, нисэх онгоц зэргийг татан төвлөрүүлж болзошгүй мөргөлдөөнд бэлдэж эхэлсэн.

Цөмийн зэвсэгтэй, тэрбум давсан хүн амтай, хүчирхэг байлдааны техник, зэвсэглэлтэй дэлхийн хоёр хүчирхэг гүрний хооронд дэгдсэн хилийн маргаан ямаршуу үр дагаварт хүргэхийг тааж хэлэх аргагүй байсан юм. Ямар ч байсан хоёр тал ийнхүү тохиролцон, дайтахаас зайлсхийсэнд дэлхийн нийт нааштайгаар хүлээн авчээ.

Эх сурвалж: BBC