Хүүхэд хамгааллын тухай хууль 2016 онд батлагдсан. Хууль батлагдсанаар улсын хэмжээнд хүүхдийн эрхийг хангах үндэсний тогтолцоо бий болсон юм. Өөрөөр хэлбэл, 20 жилийн дараа өөрчлөлт орсон энэ хуульд хүүхдийн эрхтэй холбоотой олон харилцааг зохицуулсан ч нөгөө талдаа дахиж засч сайжруулах заалт байгааг албаныхан хэлж байна.

УИХ-ын НББСШУ-ны Байнгын хороо Хүүхэд хамгааллын талаар авч хэрэгжүүлэх арга хэмжээний тухай тогтоол баталсан байна. Энэ талаар тус байнгын хорооны дарга Ё.Баатарбилэг “Хүүхэд хамгааллын хуульд маш олон зохицуулалт нэмж хийх шаардлага байгаа. Хүүхдийн эрх зөрчигдөж байгаад хуулийн хариуцлага хөнгөдөж байна гэх шүүмжлэл их яригддаг” гэлээ. Хүүхдийн эрхийг хамгаалахад салбар дундын зохицуулалт сайжирч байгаа ч анхан шатны нэгжид гэр бүл, хүүхэд хамгааллын чиглэлээр ажиллах хүний нөөц дутмаг байна.

Түүнчлэн шинээр батлагдсан хуулиудын хэрэгжилттэй холбоотой сум, хорооны нийгмийн ажилтны ажлын ачаалал нэмэгдэж, хуулиар хүлээсэн үүргээ бүрэн хэрэгжүүлэхэд хүндрэл үүсч байгааг ХНХЯ-ны Төрийн нарийн бичгийн дарга Г.Өнөрбаяр хэлж байсан юм. Хүүхдийн эрхийг хамгаалахад шинээр батлагдсан хууль зарим тохиолдолд хүчгүйдэж байна. Тиймээс УИХ-ын Хууль зүйн байнгын хороо энэ асуудлаар ажлын хэсэг байгуулсан байна. Хууль эрхзүйн орчныг нь өөрчлөх, чангатгах чиглэлд уг ажлын хэсэг ажиллаж эхэлжээ.

Эх сурвалж: dnn.mn