Төр, нийгэмд шударга ёс тогтоох ажлыг УИХ-ын дарга М.Энхболдыг огцруулснаар эхлүүлэхээр нэгэн жилийн дөрвөн өнгийг барлаа. Эрх баригч намд үүсээд байгаа энэ нөхцөл байдлаар далимдуулан өөрсдийгөө олонд ил гаргах гэсэн МАН-ын нялхсын өвчин сэдэрч, сүүлдээ өөрөө өөрийнхөө мэхэнд унацгааж эхэлжээ. Хууль тогтоох дээд байгууллагын хууль бус даргаа өмгөөлсөн нөхдийн өдүүлсэн гэмт үйлдэл олонд ил болж байгаа нь сайшаалтай. Гэвч УИХ-ын даргын суудал болон өөрсдийн эрх ашгаа хамгаалагчдын "тэмцэл" нь төр, нийгэмд үймээн дэгдээх нь бас тийм ч сайнгүй.
Учир нь түүнийг өмгөөлсөн МАН-ын нялхас сонгогчдынхоо нүүрийг харах нь бүү хэл “Дээлээ нөмрөх” ч магадлалтай боллоо. “Муу хүний балаг мянган хүнд” ч гэдэг. Хууль бус спикерээ дэмжсэн УИХ-ын гишүүн Н.Номтойбаярын Цагаан суварга бүхий 36 лицензийн асуудал ил болж, нийт үнэлгээг хүртэл 23 тэрбум ам.доллар буюу 60 гаруй их наяд төгрөгийн өртөгтэй хэмээн бодоод гаргачихаж. Үүнээс харвал МАК-ийн өв залгамжлагч маань өнөөдрийн байдлаар Монгол Улсын долоон жилийн төсөвтэй тэнцэх хэмжээний хөрөнгөтэй аж. Тэр ч бүү хэл, хүчингийн, зодооны, хүн амины, хутганы гэх мэт хэргүүд өдүүлсэн тухай ч цахим дүүрэн байгаа нь М.Энхболдын сүүдэр томорч, нялхас жиндэж эхэлснийг харуулсан хэрэг.
Сүүлдээ Н.Номтойбаярын амь тэмцэж, Ерөнхий сайдыг өөрийн хүсэлтээр огцрох өргөдлөө 48 цагийн дотор өргөн барихгүй бол Засгийн газрыг огцруулах бичигт гишүүдийн гарын үсгийг цуглуулна гэдгээ мэдэгдэж явна. Хэн ч зүгээр шахам авчихсан тэр их хөрөнгийг төрд буцаан өгөхийг хүсэх юм бэ? Түүний хувьд аргаа барахдаа “Цагаан суврага”-ын ордыг Засгийн газраар барьцаалж байгаа бололтой.
Мөнхүү М.Энхболдыг хамгаалсан С.Бямбацогт гишүүний Ховд аймагт будилуулсан тендер, концессын асуудал ч сөхөгдөж, Ц.Цогзолмаа сайдынхаа суудлаас бууж, төрийн албанд шургуулсан ах дүү, амраг садангийнх нь асуудлыг олон нийт бүгд мэддэг боллоо. Гэтэл Хууль тогтоох дээд байгууллагын хууль бус даргадаа үнэнч зүтгэсэн Ж.Мөнхбат гишүүний гурван тэрбум төгрөгийн үнэтэй орон сууц, концесс, өндөр өртөг бүхий үл хөдлөх хөрөнгийн тухай баримт дэлгэгдэж, эх үүсвэрээ шалгуулахаас өөр аргагүй байдалд орчихлоо. Үүнээс гадна ЖДҮ-ийг хөгжүүлэх сангаас зээл авсан нөхөдтэй тохиролцох арга зам хайхаас эхлээд Төрийн ордонд үймээн их байна.
М.Энхболдоос болоод Т.Бадамжунай элгэн нутгаа орхин, хилийн чанад сүүл хавчсан гэх мэдээлэл бий. Насны эцэст ийн харь нутаг руу сүүлээ хавчин зугтаах ямар сайн байхав дээ. Харьд зугаалж явсан Ерөнхийлөгч асан Ц.Элбэгдорж хүртэл яаран сандран эх орондоо ирж, бантахдаа баахан хөнгөн үйлдвэр хөгжүүлэх тухай үлгэр яриад, уучлал ч хүсч байх шиг. М.Энхболдыг суудлаасаа зуурах тусам сүүдэр нь томорч, тэр хэрээр хууль бус үйлдэлтэнгүүдийн уурхайг уудалж байна.
Уг нь түүнийг огцруулах асуудал сүүлдээ эрх баригч намын Бага хурлын индэр хүртэл заларч, УИХ-ын даргыг өөрийн хүсэлтээр огцрох өргөдлөө өгөх нь зүйтэй гэсэн тогтоолын төслийг батлуулсан. Гэсэн хэдий ч спикер маань "Цаг нь болоогүй. Би хариуцлага хүлээхгүй, ажлаа өгөхгүй" хэмээн мэдэгдсэн. Энэ хэрээр тэмцлийн шуурга дэгдэж, түүнийг өмгөөлсөн бүхний хууль бус үйлдэл дэлгэгдэж байгаа нь харин сайн хэрэг юм даа. Энэ тохиолдолд хуулийнханд харин нэлээд ажил нэмэгдэж байгаа бололтой. Тэд яг ийм халуун дээр нь шалгаж, шүүж, үнэн мөнийн учрыг олж, олон нийтийн төөрөгдлийг нэг талд гаргамаар байгаа юм.
