Жижиг, дунд үйлдвэрийг хөгжүүлэх сантай холбогдох хэргийн талаар болон бусад асуудлаар Нийслэлийн Ерөнхий прокурор Д.Баярмагнай сэтгүүлчдийн асуултад  дараах хариултыг өглөө. 

-Жижиг, дунд үйлдвэрийг хөгжүүлэх сангаас зээл авсан нэр бүхий гишүүн, сайд нартай холбогдох хэрэг ямар шатандаа явна вэ?

-ЖДҮ-тэй холбогдох хэргийн мөрдөн шалгах ажиллагаа явагдаж байна. Мөрдөн шалгах ажиллагааны талаарх нууцлалыг хангах асуудлыг хуулиар зохицуулсан. Тиймээс энэ талаар мэдээлэл өгөх боломжгүй. Зээлтэй холбогдуулан төрийн өндөр албан тушаалтан, албан тушаалын байдлаа урвуулан ашиглаж хамаарал бүхий этгээддээ зээл олгосон асуудал байгаа эсэхийг шалгаж байна.

-Зээлд нэр холбогдсон бүх албан тушаалтныг шалгаж байна гэж ойлгох уу?

-ЖДҮ-гээс 2018 онд 222 зээл олгогдсон байдаг. Нийт 96 тэрбум төгрөгийн зээл авагдсан. Энэ асуудалд хууль бус үйлдэл байгаа эсэх дээр л мөрдөн шалгах ажиллагааг явуулж байна шүү дээ.

-Зээл авсан хэрэгт холбогдуулан хэчнээн хүнийг цагдан хориод байгаа вэ?

-Зургаан хүнийг цагдан хорьж байна.

-Гишүүд, сайд нарын хамаарал бүхий хүмүүс үү?

-Үгүй.

-Яг ямар үндэслэлээр цагдан хорьсон юм бэ?

-ЖДҮ-гээс олгогдсон зээл зориулалтын дагуу ашиглагдах ёстой. Гэтэл шалгалтын явцад зориулалтын бусаар ашигласан, зээлээ хугацаандаа хийгээгүй зэрэг шалтгаан бий. 

-Яг хэдэн гишүүнийг шалгаж байгаа юм. Бүрэн эрхийг нь түдгэлзүүлэх шаардлагатай хэдэн гишүүн байгаа юм бэ?

-Энэ талаар мэдээлэл өгөх боломжгүй.

-Хүнс, хөдөө аж ахуйн, хөнгөн үйлдвэрийн сайд асан Б.Батзориг гишүүний бүрэн эрхийг түдгэлзүүлээгүй. Энэ тохиолдолд мөрдөн шалгах ажиллагаанд ямар нэгэн хүндрэл гарч байна уу?

-Нэгэнт УИХ-ын гишүүний бүрэн эрхээс энэ хүний халдашгүй байдлыг түдгэлзүүлээгүй. Одоогоор ямар нэгэн саад гараагүй, мөрдөн шалгах ажиллагаа үргэлжилж байна.

-Улсын Ерөнхий прокурорын орлогч зээл авсан хэрэгт нэр холбогдсон. Тэгсэн хэрнээ ЖДҮ-тэй нэр холбогдсон нөхдийг шалгах Ажлын хэсэгт багтсан гэх мэдээлэл бий. Ийм зүйл байж болдог юм уу?

-Улсын Ерөнхий прокурорын орлогч энэ хэргийн хянан шийдвэрлэх ажиллагаанаас нэрээ татсан, татгалзсан. Улсын Ерөнхий прокурор шийдвэр гаргасан. 

-Авлига, албан тушаалын томоохон хэргүүд шалгагдсан ч прокурорын байгууллагад очоод замхардаг, хэргийн явц удааширдаг нь ямар шалтгаантай юм бэ?

-Энэ хэргүүд цар хүрээ том. Тэр утгаараа мөрдөн шалгах ажиллагаа хийгддэг, хугацаа алдах тохиолдол бий. Гэхдээ тодорхой зарим хэргийг шүүхэд шилжүүлсэн.

-Нэр бүхий хүмүүст холбогдох хоёр вагон самар хулгайлсан хэргийг прокурорын байгууллага хэрэгсэхгүй болгосон гэх мэдээлэл байна. Энэ үнэн үү?

-Ташаа мэдээлэл. Энэ хэрэг дээр ажиллаж, хэргийг хэрэгсэхгүй болгосон хяналтын прокурорын тогтоолыг хүчингүй болгосон.

-Хэн хүчингүй болгосон гэж вэ?

-Би. Одоо хэргийг шүүхэд шилжүүлэхэд бэлэн болчихсон байна.

-Хэргийг прокурор үзэмжээрээ шийдэж болох уу?

-Тэр бол прокурорын бүрэн эрхийн асуудал. Өнгөрсөн долдугаар сард шийдвэрлэсэн хэрэг юм. Улмаар наймдугаар сард Нийслэлийн ерөнхий прокурор миний бие хянаж үзээд энэ асуудлыг хүчингүй болгосон. Одоо шүүхэд шилжүүлэх гэж байна.

-Хэргийг хэрэгсэхгүй болгосон хяналтын прокурорт ямар нэгэн арга хэмжээ авсан уу?

-Хууль бус гэж үзэх боломжгүй. Прокурор бүрэн эрхийнхээ хүрээнд гаргасан шийдвэр юм.

-Та нарт улс төрийн нөлөөлөл байдаг уу?

-Бид хэн нэгний шахалт, нөлөөлөлд автахгүй.