Дэлхий дахинд гарч буй санхүүгийн луйврын 70 хувь нь хулгайлагдсан карт болон хувь хүн, байгууллагын мэдээлэл ашиглан үйлдэгддэг бөгөөд эдүгээ хохирлын хэмжээ нь 16 тэрбум ам.долларт хүрээд байна. Тиймээс  дэлхийн гэмт хэргийн үзүүлэлтийн хоёрт кибер гэмт хэрэг эрэмблэгдэж, топ-4 эрсдэлийн нэгт тооцогдож байна.

Ялангуяа залилагч этгээдүүд (hacker) бизнесийн байгууллагууд хоорондын и-мэйл харилцааг ашиглан данс өөрчлөгдсөн тухай болон хуурамч нэхэмжлэх илгээх зэргээр ихээхэн хэмжээний хохирол учруулдаг. 

Ганцхан жишээ татахад 2017 онд Japan Airlines компанид Boeing онгоц нийлүүлэгч компаниас данс өөрчлөгдсөн талаарх и-мэйл иржээ. Тус компанийн ажилтан нягтлалгүйгээр онгоцны лизингийн төлбөрийг шилжүүлснээс үүдэн 3,4 сая ам.долларыг хакеруудад алдсан байна.

Монгол Улсын хувьд интернет хэрэглэгчдийн 60 хувь нь буюу 5 хүн тутмын 3 нь жилд ямар нэг байдлаар кибер халдлагад өртдөг гэсэн судалгаа бий.  Байгууллагуудын хувьд 2016 онд 2 тэрбум, 2017 онд 7,5 тэрбум төгрөгийн хохирол амсчээ.

Иймд Голомт банк, Юнител групп хамтран харилцагч байгууллагуудаа кибер халдлагаас хамгаалах, урьдчилан сэргийлэх мэдлэг мэдээллийг олгох үүднээс “Кибер аюулгүй байдал” сэдэвт сургалтыг 2018 оны 10 сарын 18-нд  зохион байгууллаа.

Тус сургалтад MCS group, Таван Богд групп, МИАТ ТӨХК, МАК ХХК, Шангри-Ла Улаанбаатар Хотел ХХК  зэрэг монголын топ 100 гаруй компанийн төлөөлөгчид оролцжээ. 

Тэд эрсдэлийн талаарх ерөнхий ойлголт болон гадаад төлбөр тооцооны эрсдэл, байгууллагад зориулсан мэдээллийн аюулгүй байдлын шийдэл, худалдааны санхүүжилтийн эрсдэлээс хамгаалах арга хэрэгсэл, цахим орчинд хэрхэн аюулгүй ажиллах талаарх арга барилд суралцаж, тус арга хэмжээний ач холбогдлыг өндрөөр үнэлсэн байна.

Эрхэм та кибер халдлагад өртөхгүйн тулд харилцагч байгууллагаас тань төлбөр хүлээн авах данс, нэр, байршил өөрчлөгдсөн талаарх мэдээлэл ирвэл заавал өөр сувгаар холбогдож давхар баталгаажуулахыг сануулж байна. Мөн өөрийн интернэт банк болон картын нууц дугаарыг бусдад алдахыг сэрэмжлэхийг анхааруулж байна.

Голомт банк